گازا سەكتورىندا تاعى قاقتىعىس بولدى

گازا سەكتورى مەن يزرايل شەكاراسىنداعى قاقتىعىستار ءالى دە تولاستاماۋدا. كەشە، جۇما كۇنى جۇزدەگەن پالەستينالىق اۆتوموبيل دوڭەلەكتەرىن جاقتى. ال يزرايل اسكەرلەرى بۇعان جاۋاپ رەتىندە كوزدى جاساۋراتاتىن گاز قولداندى. بۇل تۋرالى euronews.com اگەنتتىگى حابارلايدى.

بۇعان دەيىن دە سايتىمىزدا حاماس قوزعالىسى تاراپىنان ۇيىمداستىرىلعان «ۇلى ورالۋ مارشىنىڭ» ناۋرىز ايىندا باستالعانى تۋرالى حابارلاعانبىز. رەسمي مالىمەتتەر بويىنشا، سول ۋاقىتتان بەرى ونداعان پالەستينالىق قازا تاۋىپ، جۇزدەگەن ادام جاراقاتتانعان.

الايدا، گازا سەكتورىنداعى ەڭ ۇلكەن قارسىلىق شاراسى 14 مامىردا  (وسى كۇنى اقش يەرۋساليمدە رەسمي  ەلشىلىگىن اشادى) بولادى دەپ كۇتىلۋدە. سونىمەن قاتار، 15 مامىردا پالەستينالىقتار اتاپ وتەتىن «اپات كۇنىندە» دە ءىرى قارسىلىق ناۋقانى بولۋى مۇمكىن.

حاماس جەتەكشىلەرىنىڭ سوزىنشە، 14-15 مامىرداعى ناۋقاندارعا ون مىڭداعان پالەستينالىق دايىندالىپ جاتقان كورىنەدى. ال يزرايل شەكارادان وتۋگە تالپىنعان كەز كەلگەن توپقا قارسى كۇش قولدانۋعا دايىندالىپ جاتقانىن مالىمدەدى.

“The Qazaq Times”