يادرولىق قارۋسىزدانۋ ىسىندە اقش پەن سولتۇستىك كورەيا ەكى ءتۇرلى كوزقاراستا

قازىر كورەي تۇبەگىندە كەلىسسوزدەر قادامى جيىلەپ، بەيبىتشىلىك پروتسەسى قالىپتاسۋدا. سولتۇستىك كورەيا بولسا، يادرولىق قارۋسىزدانۋ ۋادەسىن بەردى، جانە ولار بۇل پروتسەستى بىرتىندەپ جۇزەگە اسىرۋدى قالايدى. الايدا، قۇراما شتاتتىڭ وعان سابىرى جەتەر ەمەس. ولار سولتۇستىك كورەيا ءبىر مەزەتتە يادرولىق قارۋلارىن جويىپ، بالليستيكالىق زىمىراندارىنان باس تارتسا دەپ ۇمىتتەنەدى. بۇل قازىرگى اقش-سولتۇستىك كورەيا قاتىناسىنداعى ورتاقتاسا الماي تۇرعان ەڭ نەگىزگى ماسەلەنىڭ ءبىرى.

ساراپشىلار بولسا، اقش-سولتۇستىك كورەيا ترامپ-كيم كەلىسسوزىنىڭ ءساتتى اياقتالۋى ءۇشىن، وسى كەلىسپەۋشىلىكتەردى ەسكەرە وتىرىپ، ەكى تاراپ ءارتۇرلى پەرسپەكتيۆالار تۋرالى الدىن الا كەلىسۋلەرى كەرەك دەپ قارايدى.

ەكى كۇن بۇرىن اقش مەملەكەتتىك حاتشىسى مايك پومپەو پيوڭياڭ (پحەنيان) ساپارىن اياقتادى. سولتۇستىك كورەياداعى ساپارىندا ول كيم جوڭ ۋنمەن كەزدەسىپ، الداعى ترامپ-كيم كەلىسسوزىنە نەگىز قالادى دەۋگە بولادى. ول كەزەكتى ساپارىندا سولتۇستىك كورەيادا قاماۋعا الىنعان امەريكالىق ازاماتتاردى ەلىنە الىپ قايتتى. پومپەو اقش-قا جەتىسىمەن: «مەن بۇل جولى كيم مىرزامەن ۇزاق اڭگىمەدە بولىپ، پرەزيدەنتپەن كەزدەسۋ ءسامميتىن تولىقتاي كەڭەستىم»،– دەدى.

ترامپ تا تۆيتتەر پاراقشاسىندا پومپەونىڭ كەلىسسوز تۋرالى تولىقتاي كەلىسىمگە كەلىپ قايتقانىن راستادى. پرەزيدەنت ترامپ مينيسترلەر كابينەتىنىڭ جينالىسىندا، ءۇش كۇن ىشىندە كەلىسسوز ۋاقىتى مەن ورنى تۋرالى سوڭعى مالىمەتتىڭ تاراتىلاتىنى، الايدا ەكى كورەيا اراسىنداعى «كەلىسىم سارايىندا» وتكىزۋ تۋرالى ۇسىنىستىڭ قابىلدانباعانىن ايتقان. بۇگىنگى حابارلاردا ترامپ پەن كيم اراسىنداعى كەزدەسۋدىڭ سينگاپۋردە 12 ماۋسىم كۇنى بولاتىنى انىقتالدى.

دەگەنمەن، مەملەكەتتىك حاتشى پومپەو كەلىسسوزدە تالقىلاناتىن يادرولىق قارۋسىزدانۋ ماسەلەسى، ونىڭ تەزىرەك جۇزەگە اسىرۋ تۋرالى پىكىر بىرلىگىنە كەلە الماعانىن مويىندادى.

“The Qazaq Times”