اقش پەن فرانتسيا اراسىنداعى كەلىسسوز: ترامپ ماكرونعا زور قۇرمەت كورسەتتى

اقش جەرگىلىكتى ۋاقىتىمەن سەيسەنبى كۇنى (23 ءساۋىر) اقش پرەزيدەنتى دونالد ترامپ ەلىنە ساپارلاي كەلگەن فرانتسيا پرەزيدەنتى ەممانۋەل ماكروندى قارسى الدى. كەزدەسۋدەن كەيىن اق ءۇي فرانتسيا باسشىسىنا ارنالعان قوناعاسى وتكىزدى. بۇل تۋرالى VOA باسىلىمى حابارلادى.

فرانتسيا پرەزيدەنتىن قارسى الۋ سالتاناتتى شاراسىندا قۇراما شتاتتىڭ 500-گە جۋىق قۇرمەت قاراۋىلى بولدى. وعان قوسا سالتاناتتى قوناقاسى كەزىندە ۋاشينگتوننىڭ (ۆاشينگتون) مەملەكەتتىك سيمفونيالىق وركەسترى ونەر كورسەتتى.

ەكى ەلدىڭ باسشىلارى اراسىنداعى كەزدەسۋدە جاھاندىق وزەكتى تاقىرىپتار تالقىعا سالىنۋى مۇمكىن دەپ كۇتىلگەن. ايتالىق، سۇرياداعى قاقتىعىستاردى شەشۋ، يران يادرولىق ماسەلەسىن ءبىرجايلى ەتۋ، وعان قوسا ساۋدا-ساتتىق تاقىرىپتارى دا ورتاعا سالىنباق.

پرەزيدەنت ترامپ ماكرونمەن كەزدەسۋدە ەكى ەلدىڭ دوستىعى، جەكە قارىم-قاتىناستارىنىڭ بەرىك ەكەنىن، سونداي-اق، ماكروننىڭ قۇراما شتات ساپارى ءوزى اق ءۇي تورىنە وتىرعالى بەرى العاش رەت شەتەلدىك ليدەردىڭ مەملەكەتتىك ساپارى ەكەنىن اتاپ ءوتتى.

حابارلارعا قاراعاندا، ماكرون اق ۇيدەگى كەزدەسۋدە ترامپتى 6 ەل قول قويعان، يران يادرولىق كەلىسىمىنەن باس تارتپاۋعا شاقىرماق. وسىعان دەيىن ترامپ بۇل كەلىسىمدى «ەڭ ناشار كەلىسىمدەردىڭ ءبىرى» دەپ باعالاپ كەلگەن بولاتىن. بۇعان قوسا ماكرون اقش-تىڭ ءسۇريا جەرىندەگى اسكەرىن ساقتاپ تۇرۋى كەرەك ەكەنىن ورتاعا سالماق.

12 مامىردا ترامپ يران يادرولىق كەلىسىمىمەن بايلانىستى سول ەلگە باعىتتالعان سانكتسيانى قايتا ىسكە قوسۋ، الدە كۇشىنەن قالدىرۋ تۋرالى شەشىم قابىلدايدى. يران ۇكىمەتى بولسا، سانكتسيالاردى قايتا قالپىنا كەلتىرۋ  كەلىسىمدى كۇشىنەن قالدىرۋمەن بىردەي بولىپ، ول يراننىڭ يادرولىق باعدارلاماسىن قايتا قولعا الۋىنا يتەرمەلەيتىنىن ايتقان.

“The Qazaq Times”