سولتۇستىك كورەيا باسشىسى: بىزگە يادرولىق سىناقتىڭ كەرەگى قالمادى

وتكەن اپتانىڭ سوڭىندا سولتۇستىك كورەيا باسشىسى كيم جوڭ ۋن (كيم چەن ىن/ Kim Jong Un) مالىمدەمە جاساپ، كحدر-نىڭ قۇرلىقارالىق بالليستيكالىق زىمىران سىناقتارىن توقتاتىپ، ەلدىڭ سولتۇستىگىندەگى يادرولىق پوليگوندى جاباتىنىن جاريا ەتكەن ەدى. كحدر باسشىسى مۇنداي سىناقتاردىڭ ەندى سولتۇستىك كورەياعا كەرەگى قالماعانىن، بىراق يادرولىق قارۋدى جاساپ بولعانىن ايتقان.

سولتۇستىك كورەيانىڭ رەسمي باق-ى: «سىناقتاردىڭ توقتاتىلۋى – كورەي تۇبەگىنىڭ قاۋىپسىزدىگى جانە ەكونوميكالىق دامۋ ءۇشىن»، – دەپ جازدى. وڭتۇستىك كورەيانىڭ «يونحاپ» اگەنتتىگى بۇل مالىمدەمەنىڭ كحدر جۇمىسشىلار پارتياسىنىڭ جينالىسىندا جاريالانعانىن اتاپ ءوتتى.

اتالعان باياندامادا، ەگەر قاۋىپ-قاتەر بولماسا سولتۇستىك كورەيا يادرولىق قارۋدى مۇلدە قولدانبايتىنى ايتىلعان. بۇعان قوسا، قانداي شارت بولسا دا يادرولىق قارۋدى سىرتقا شىعارمايتىنى تۋرالى دا مالىمدەگەن.

بۇل تۋرالى قۇراما شتات پرەزيدەنتى ترامپ ءوزىنىڭ «تۆيتتەر» پاراقشاسىنا: «بۇل سولتۇستىك كورەيا جانە دۇنيەجۇزى ءۇشىن ۇلكەن پروگرەسس. مەن ءبىزدىڭ كەزدەسۋدى تاعاتسىزدانا كۇتەمىن»، – دەپ جازدى. ەستەرىڭىزدە بولسا ناۋرىز ايىندا ترامپ كۇتپەگەن جەردەن سولتۇستىك كورەيا باسشىسىنىڭ كەزدەسۋ تۋرالى ۇسىنىسىن قابىل العان ەدى. بۇل وسىعان دەيىن قۇراما شتات پرەزيدەنتتەرىنىڭ بىردە ءبىرى جاساماعان قادام بولاتىن. دەگەنمەن، كەزدەسۋدىڭ ناقتى ۋاقىتى ءالى دە انىق بولماي كەلەدى. ترامپ العاشقى سوزدەرىندە بىرىندە «ماۋسىمنىڭ باس شەنىندە بولۋى مۇمكىن» دەگەن مالىمەت تاراعان. كەيىن مامىر ايىندا بولاتىنى تۋرالى ايتىلدى.

حابارلارعا قاراعاندا، كەلىسسوزگە دايىندىق ماقساتىندا سولتۇستىك كورەياعا اقش ورتالىق بارلاۋ اگەنتتىگىنىڭ جەتەكشىسى مايك پومپەو بارىپ قايتقان.

سولتۇستىك كورەيا الەمنەن وقشاۋلانىپ قالعان ەلدەردىڭ ءبىرى. قازىرگە دەيىن التى رەت يادرولىق سىناق جاساعان. ونىڭ سىرتىندا كوپ رەت قۇرلىقارالىق بالليستيكالىق زىمىران سىناقتارىن جاسادى. بىلتىر سولتۇستىك كورەيا قۇرلىق ارالىق بالليستيكالىق زىمىران جاساۋدا جوعارى ناتيجە كورسەتىپ، وزدەرىنىڭ يادرولىق قارۋ تاسىعىش زىمىراندارىنىڭ قۇراما شتاتتىڭ كەز-كەلگەن قالاسىنا جەتكىزە الاتىنىن كورسەتتى. بۇل جەتىستىگى اقش-تى جانە الەم ەلدەرىن يادرولى سوعىس قاۋىپىمەن الاڭداتقان ەدى.

بىراق، بيىل جىل باسىنان بەرى كحدر باسشىسى ءوزىنىڭ سىرتقى ساياساتىن وزگەرتىپ، يادرولىق جانە زىمىران سىناقتارىن توقتاتىپ، وڭتۇستىك كورەيا جانە ونىڭ وداقتاسى اقش-پەن كەلىسسوزگە دايىن ەكەنىن جەتكىزگەن بولاتىن.

“The Qazaq Times”