فوتو: centralasian.org

پارلامەنت سەناتى قازاقستان مەن قۇراما شتاتتار اراسىندا اۋعانستاندى تۇراقتاندىرۋ جانە قالپىنا كەلتىرۋگە بايلانىستى قازاقستاننىڭ تەمىرجول ءترانزيتى ارقىلى جۇك قامتاماسىز ەتۋ جونىندەگى حاتتاماعا وزگەرىستەر ەنگىزۋ جونىندەگى راتيفيكاتسيانى قابىلدادى. بۇل تۋرالى ورتالىق ازيا جاڭالىقتار قىزمەتى حابارلادى.

زاڭ جوباسىندا اقتاۋ جانە قۇرىق پورتتارىن دا ءترانزيتتىڭ ءبىر بولىگى رەتىندە ەنگىزگەن. بۇل كاسپي تەڭىزى ارقىلى اۋعانستانعا تەمىرجول تاسىمالىن قامتاماسىز ەتەدى.

اتالعان مارشرۋتتى امەريكالىق تاراپ «بالاما» رەتىندە قاراستىرادى جانە جۇكتى ازەربايجاننان كاسپي تەڭىزى ارقىلى قازاقستاندىق اقتاۋ جانە قۇرىق پورتىنا جەتكىزىپ، ءارى قاراي تەمىرجولمەن وزبەكستان اۋماعى ارقىلى اۋعانستانعا جونەلتەدى.

حاتتاماعا 2017 جىلدىڭ 21 قىركۇيەگىندە نيۋ-يوركتە قول قويىلعان. «بۇل ءترانزيتتىڭ ىسكە اسۋى اۋعانستاندا بەيبىتشىلىك پەن تۇراقتىلىقتى قالايتىن قازاقستان مۇددەسىنە تولىعىمەن سايكەس كەلەدى»،- دەپ سەناتتىڭ حالىقارالىق قورعانىس جانە قاۋىپسىزدىك كوميتەتى ەسەپ بەرگەن.

“The Qazaq Times”