سولتۇستىك كورەيا باسشىسى كيم جوڭ ۋن. فوتو: ABC.

وڭتۇستىك كورەيا پرەزيدەنتى كەزەكتى مالىمدەمەسىندە، سولتۇستىك كورەيانىڭ الداعى ۋاقىتتا ترامپپەن بولاتىن كەلىسسوز ءۇشىن العى شارت قويمايتىنىن ايتتى. اقش پەن سولتۇستىك كورەيا باسشىلارى اراسىنداعى كەزدەسۋدە كورەي تۇبەگىنىڭ يادرولىق قارۋسىزدانۋ ماسەلەسى تالقىلانادى دەپ كۇتىلۋدە. بۇل تۋرالى Yonhap اقپاراتتىق اگەنتتىگى حابارلادى.

وڭتۇستىك كورەيا پرەزيدەنتى ءمۇن جاين كەشە سەۋلدە وتكەن بيزنەس باسشىلارىمەن كەزدەسۋ كەزىندە: «ولار قۇراما شتاتقا كەلىسسوز ءۇشىن قانداي دا ءبىر شارت بەكىتكەن جوق. ايتالىق، اقش ارمياسىن كورەي تۇبەگىنەن شىعارۋ تالابى. ولار قاۋىپسىزدىك ماسەلەسىنەن بۇرىن سولتۇستىك كورەياعا قاراتىلعان دۇشپاندىق ساياساتتىڭ اياقتالۋىن تالاپ ەتپەك»، – دەدى.

وڭتۇستىك كورەيا باسشىسى سوزىندە: «مەنىڭ بىلۋىمشە، يادرولىق قارۋ ماسەلەسىندە وڭتۇستىك-سولتۇستىك ەكى تاراپتىڭ كوزقاراسىندا ەشقانداي ايىرماشىلىق جوق، سولتۇستىك كورەيا يادرولىق قارۋدى تولىعىمەن جويۋعا كەلىسىم بەرىپ وتىر»، – دەدى. ول جانە 27 ءساۋىر كۇنى بولاتىن وڭتۇستىك- سولتۇستىك كورەيا باسشىلارىنىڭ كەزدەسۋىنەن كەيىن، كحدر باسشىسى اقش تارابىمەن كەزدەسۋدى بىردەن باستاي بەرۋى كەرەك ەكەنىن ايتتى.

اقش پەن سولتۇستىك كورەيا باسشىلارىنىڭ كەزدەسۋ ۋاقىتى ءالى انىق ەمەس.

“The Qazaq Times”