پەنتاگون رەسەيدىڭ جالعان اقپارات تاراتقانىن سىنعا الدى.، فوتو: Daily Express.

پەنتاگوننىڭ رەسمي وكىلى جاساعان سوڭعى مالىمدەمەدە، اقش، ۇلىبريتانيا جانە فرانتسيا بىرلەسكەن سۇرياعا قارسى زىمىران شابۋىلىنان كەيىن، ءسۇريا رەجيمىنىڭ قايتالاي حيميالىق قارۋ قولدانۋعا مۇمكىندىگى جوق ەكەنىن ايتتى. بىراق، ول اقش پەن ونىڭ وداقتاستارىنا ءالى دە قىراعى بولۋ كەرەك ەكەنىن ەسكەرتتى. بۇل تۋرالى VOA اقپاراتتىق سايتى حابارلادى.

پەنتاگوننىڭ حاتشىسى ۋايت بەيسەنبى كۇنى جۋرناليستەرگە جاساعان مالىمدەمەسىندە: «ءسۇريا پرەزيدەنتى اساد الەمنىڭ قانداي جاعدايدا دا حيميالىق قارۋ قولدانۋعا جول بەرمەيتىنىن ءتۇسىنۋى كەرەك. ءۇش ەلدىڭ بىرلەسكەن زىمىران شابۋىلىنان كەيىن، ءسۇريادا حيميالىق شابۋىل جاساۋعا ەش مۇمكىندىك قالمادى. بىراق، اقش جانە وداقتاس ەلدەر ءالى دە قىراعى بولۋى كەرەك»، – دەدى.

پەنتاگون مالىمدەمەشىسى ءۇش ەلدىڭ زىمىران شابۋىلى باستالا سالىسىمەن رەسەي تارابىنىڭ جالعان مالىمەتتەردى تاراتقانىن، سول ارقىلى جۇرتتى شاتاستىراتىن ايىپتادى.  ۋايت رەسەي تارابىن  «ارانداتۋ سيپاتىنداعى جالعان مالىمدەمەلەر تاراتتى» دەپ سىنعا الدى.

زىمىران شابۋىل بولعان كۇنى ەرتەمەن جەتكەن جاڭالىقتاردىڭ بارىندە ءسۇريا ۇكىمەتىنىڭ 13 راكەتانى اتىپ تۇسىرگەنى تۋرالى ايتىلعان. رەسەيلىك اقپارات قۇرالدارىنان الىنعان ينفورماتسيالار تولىقتاي وسىعان ۇقساس بولعان. كەيىن پەنتاگون مالىمدەمەسىندە ءسۇريا رەجيمىنىڭ زىمىران شابۋىلىنا قارسى ەش شارا جاساي الماعانىن مالىمدەدى. ءسۇريا قورعانىس جۇيەسى اقش زىمىراندارىن توسىپ العانى نەمەسە زىمىران شابۋىلىنىڭ نىساناعا ءدال تيمەدى دەگەن مازمۇنداعى اقپاراتتى پەنتاگون تارابى تەرىسكە شىعاردى.

“The Qazaq Times”