ەردوعان: ءافريندى كىمگە قايتارۋدى سەرگەي لاۆروۆ ەمەس، ءبىز بەلگىلەيمىز

تۇركيا پرەزيدەنتى رەجەپ تايىپ ەردوعان، وزىنە قاراستى پارتيا جينالىسىنان كەيىن رەسەيدىڭ سىرتقى ىستەر ءمينيسترى لاۆروۆتىڭ افرينگە قاتىستى مالىمدەمەسىنە جاۋاپ قايتارىپ، «كىمگە قايتاراتىنىمىزدى ءوزىمىز بىلەمىز»، - دەدى.

ەستەرىڭىزگە سالا كەتسەك، سەرگەي لاۆروۆ دۇيسەنبى كۇنى جاساعان مالىمدەمەسىندە: «تۇركيا ءافريندى ءسۇريانىڭ باقىلاۋىنا قايتارۋى كەرەك» دەگەن بولاتىن. وسىعان قاتىستى ءوز جاۋابىن بەرگەن ەردوعان: «بۇل مالىمدەمە وتە قاتە. ءبىز ءافريندى كىمگە قايتارۋ كەرەك ەكەنىن بارىنەن جاقسى بىلەمىز. ءسۇريادا قازىر باسقا ەلدەردىڭ باقىلاۋىنداعى جەرلەر ونسىز دا جەتەدى. مىنە، سول جەرلەردىڭ سۇرياعا قايتارىلۋى تالقىلانسىن. ءبىز ۋاقىتى كەلگەندە ءافريندى افريندىكتەردىڭ وزدەرىنە قايتارامىز. الايدا، ونى قاشان قايتارۋ — ءبىزدىڭ شەشىمىمىز. ونى قۇرمەتتى لاۆروۆ ەمەس، ءبىز بەلگىلەيمىز»، - دەدى.

سونىمەن قاتار، ەردوعان جۋرناليستەردىڭ «اقش پرەزيدەنتى دونالد ترامپپەن تەلەفون ارقىلى سويلەسۋگە نيەتىڭىز بار ما؟» دەگەن سۇراقتارىنا: «ءدال قازىر قوڭىراۋ شالسا سويلەسپەۋ ءۇشىن ەشقانداي سەبەپ جوق. ەگەر قاجەت بولىپ جاتسا، وعان ءوزىم قوڭىراۋ سوعامىن» دەدى.

“The Qazaq Times”