قازاقستاندا ەت باعاسى كوتەرىلدى

ەلىمىزدە ازىق-تۇلىك ونىمدەرى باعاسى ءتۇرلى دەڭگەيگە جەتىپ وتىر. سونىڭ ىشىندە، ايرىقشا ەت باعاسى ەداۋىر دەڭگەيدە ارتقان. بۇل تۋرالى قر ۇلتتىق ەكونوميكا مينيسترلىگىنىڭ ءباسپاسوز قىزمەتى حابارلايدى.

قازاقستاندا ۇستىمىزدەگى جىلدىڭ ناۋرىز ايىندا 2017 جىلدىڭ جەلتوقسان ايىمەن سالىستىرعاندا اۋىلشارۋاشىلىق ونىمدەرىنىڭ باعاسى 0,4%-عا، مال ونىمدەرىنىڭ باعاسى  1,6%-عا ارتىپ، ال استىق ونىمدەرىنىڭ باعاسى 0,3%-عا تومەندەگەن. اتالعان مەكەمەنىڭ مالىمەتى بويىنشا، قاڭتار-ناۋرىز ايلارىندا قاراقۇمىق (گرەچيحا) باعاسى 2,7%-عا، قارابيداي - 1,8%-عا،  بيداي - 0,4%-عا، جۇگەرى 0,3%-عا، سۇلى - 1,6%-عا، تارى - 1%-عا، ال كۇرىش باعاسى 0,4%-عا تومەندەگەن.

بۇلاردان بولەك، جابىق توپىراقتا وسىرىلگەن قيار باعاسى - 24,1%-عا، كاپۋستا - 5,1%-عا،  قىزاناق - 3,4%-عا، كارتوپ پەن قىزىلشا 0,5%-عا ارتقان. ال ءسابىز 0,8%-عا، پياز - 0,4%-عا ارتقان. تۇتىنۋشىلار باعا نارىعىنداعى وسىنداي ەلەۋلى وزەرىستى، ياعني كەيبىر ازىق-تۇلىك باعالارىنىڭ تومەندەۋىنە قۋانعانمەن، ەت باعاسى كەرىسىنشە كوتەرىلىپ تۇر. ماسەلەن، تاۋىق ەتىنىڭ باعاسى 3,3%-عا، ءىرى قارا مال ەتى - 2,2%-عا، جىلقى ەتى - 0,9%، قوي ەتى - 0,6%-عا ارتقان. شيكى ءسۇت باعاسى 3,6%-عا، قوي ءجۇنى 1,1%، ال تاۋىق جۇمىرتقاسىنىڭ باعاسى - 4%-عا ازايعان.

“The Qazaq Times”