اقش باسىلىمدارى گۇلنار كاريموۆا تۋرالى زەرتتەي باستادى

بىرنەشە جىلدان بەرى وزبەكستاننىڭ بۇرىنعى پرەزيدەنتىنىڭ ۇلكەن قىزى گۇلنار كاريموۆانىڭ تاعدىرى تۋرالى ەشقانداي سەنىمدى اقپاراتتىڭ جوق ەكەنى بەلگىلى. "The New York Times" باسىلىمىندا 5 ءساۋىر كۇنى جارىق كورگەن "وزبەكستاننىڭ حابارسىز كەتكەن ء"بىرىنشى قىزى" — گۇلنار قايدا ءجۇر؟" اتتى ماقالادا ونىڭ ءالى كۇنگە دەيىن اكەسىنىڭ مازارىنا دا بارماعانى جازىلعان. ونىڭ ۇستىنە، اكەسىنىڭ جەرلەۋ راسىمىندە دە، ول قايتىس بولعاننان بەرى بۇگىنگە دەيىن ۇيىمداستىرىلعان 35 مىڭ ەسكە الۋ راسىمدەرىنىڭ بىرەۋىندە دە توبە كورسەتپەگەن.

اتالعان ماقالادا ونىڭ 2014 جىلدان بەرى جۇرت كوزىنە مۇلدەم كورىنبەگەنى ايتىلىپ: "كوپشىلىك گۇلنار كاريموۆانى قايتىس بولدى دەپ ەسەپتەيدى ءارى بۇل اقپاراتتى جوققا شىعاراتىن ەشقانداي دالەل دە جوق" دەپ جازىلعان.  حيۋمان رايتس ۆوتچ (Human Rights Watch) حالىقارالىق ادام قۇقىقتارىن قورعاۋ ۇيىمىنىڭ ورتا ازيا ىستەرى جونىندەگى ساراپشىلارى "The New York Times" باسىلىمىنا مالىمدەمە جاساپ، ولارعا كاريموۆانىڭ ءتىپتى بۇرىنعى كۇيەۋى مانسۇر ماكسۋديدىڭ دە كومەك سۇراعانىن ايتقان. وزبەك-اۋعان تەكتى امەريكالىق پەن 2002 جىلى كاريموۆانىڭ اراسىندا اجىراسۋ ءىسى مەن بالالارىنا قاتىستى ۇلكەن داۋ بولعان ەدى. اقىرى سول كەزدە قۇرىعى ۇزىن گۇلنار ونى وزبەكستانداعى "coca-cola"-مەن بايلانىستى بيزنەسىنەن ايىرعان ەدى. كەيىن ونىڭ وزبەكستاندا تۇراتىن 24 تۋىسىنىڭ ءبارى قاي ەلدىڭ ازاماتتارى بولعاندارىنا قاراماستان اۋعانستانعا جەر اۋدارىلىپ، ەكى تۋىسى تۇرمەگە توعىتىلعان. بىراق قازىرگى ۋاقىتتا مانسۇر ءوزىنىڭ بۇرىنعى ايەلىنىڭ تاعدىرىنا قاتىستى ءمان-جايدى انىقتاعىسى كەلەتىن كورىنەدى. سونىمەن قاتار اكەسىنىڭ قۇرمەتىنە يسلام ەسىمى بەرىلگەن ونىڭ ۇلى دا اناسىنىڭ سىرتقى الەمنەن وقشاۋ ۇستاۋدا ەكەنىن ايتىپ شاعىمدانعان. يسلامنىڭ ءوزى ۇلىبريتانيادان ساياسي باسپانا سۇراعان.

“The Qazaq Times”