قىرعىز ميليتسياسى زاعيپ بەلسەندىنى قاماۋعا الدى

سءوز بوستاندىعىن قورعاۋ كوميتەتى زاعيپ بەلسەندى تەميرلان ورمۋكوۆتىڭ قامالعانىنا نارازىلىق ءبىلدىرىپ مءالىمدەمە جاسادى. بۇل تۋرالى وتالىق ازيا جاڭالىقتار قىزمەتى حابارلادى.

«ءسوز بوستاندىعىن قورعاۋ كوميتەتى كوز جانارىنا قاتىستى مۇگەدەك، اقىن تەميرلان ورمۋكوۆتى كۇشپەن قولىنا كىسەن سالىپ، تەرگەۋ اباقتىسىنا قاماۋىن ادامگەرلىشىككە جات ارەكەت دەپ قابىلدايمىز»،- دەلىنگەن مالىمدەمەدە.

كوميتەت بۇل ىسكە قىرعىزستان پرەزيدەنتى سوورونباي جەەنبەكوۆتىڭ، پارلامەنتتىڭ تىكەلەي ارالاسۋىن سۇراپ، پروكۋراتۋرا، سوت جانە ميليتسيانىڭ قاتىگەز ارەكەتتەرىن ايىپتايدى.

2016 جىلى باس پروكۋراتۋرا تەميرلان ورمۋكوۆتىڭ سول كەزدەگى پرەزيدەنتتى سىناعان ولەڭدەرىن ينتەرنەتتەن تاۋىپ، "ايماقارالىق ارازدىق تۋعىزدى" دەگەن ايىپپەن قىلمىستىق ءىس قوزعاعان. باس پروكۋراتۋراعا دەپۋتات داستان بەكەشەۆ ارىزدانعان.

كەيىن ورمۋكوۆ بەكەشەۆكە قارسى زاڭدى بۇزىپ وتىر دەپ سوتقا شاعىم تۇسىرگەن. بىراق ارىزداعى اقپارات راستالمادى دەپ، بەلسەندىنىڭ وزىنە "قىلمىس جاسادى دەپ جالعان اقپارات بەردى" دەگەن ايىپپەن قىلمىستىق ءىس قوزعادى.

بىشكەكتىڭ وكتيابر اۋداندىق سوتى ورمۋكوۆ وتىرىسقا كەلمەدى دەپ، ونى ءبىر ايعا قاماۋ تۋرالى شەشىم شىعارعان. ونىمەن قوسا، پاتەرى دە بۇعاتتالعان. 5 ساۋىردە ونى اۋرۋحانادا جاتقان جەرىنەن ميليتسيا وكىلدەرى قولىنا كىسەن سالىپ، كۇشتەپ الىپ كەتكەن.

“The Qazaq Times”