يراندى دۇرلىكتىرگەن يزرايل ۇشاعى تۋرالى حابار تەرىسكە شىعارىلدى

ناۋرىزدىڭ سوڭىندا كۋۆەيتتىڭ «al-Jarida» باسىلىمى، يزرايل اسكەري-اۋە كۇشتەرىنە قاراستى F-35 سوعىس ۇشاقتارى ءسۇريا مەن يراك ارقىلى يراننىڭ اۋە كەڭىستىگىنەن كىرگەنى تۋرالى حابارلاعان بولاتىن. ءبىر كۇنى بۇرىن رەسەي قورعانىس مينيسترلىگى مالىمدەمە جاساپ، بۇل حاباردى تەرىسكە شىعاردى. بۇل تۋرالى IRNA اقپاراتتىق اگەنتتىگىنىڭ رەسمي سايتى جازدى.

«al-Jarida» باسىلىمى 29 ناۋرىز كۇنگى حابارىندا: «يزرايل اۋە كۇشتەرىنە قاراستى F-35 سوعىس ۇشاقتارى ءسۇريا مەن يراك اۋە كەڭىستىگىنەن ءوتىپ، يراننىڭ باندار-ابباس، يسفاحان، شيراز قالالارىندا بارلاۋ جۇرگىزدى»، – دەپ مالىمدەگەن. بۇل حابار يراندى كۇشتى اڭىس تۋدىردى جانە تۇرعىندارى ەلدەرىنىڭ اۋە قورعانىس قۋاتىنا دەگەن سەنىمسىز كوزقاراستار اشىق ايتا باستادى.

اقش وندىرەتىن F-35 ۇشاقتارى الەمنىڭ ساناۋلى ەلدەرىندە عانا بار. ايتالىق، اقش-تان وزگە يزرايل، انگليا، اۋستراليا (اۆستراليا), جاپونيا، كانادا، وڭتۇستىك كورەيا، يتاليا، نورۆەگيا، فرانتسيا دانيا جانە نيدەرلاندى ەلدەرىنە عانا ساتىپ بەرگەن. يزرايل وتكەن جىلدىڭ سوڭىندا اقش-تان ساتىپ العان F-35 «قىرعي» ۇشاقتارىن اسكەري اۋە كۇشتەرىنىڭ پايدالانۋىنا بەرگەن بولاتىن. بۇل ءيزرايلدى  ورتا شىعىس ەلدەرى اراسىندا اۋە كۇشتەرى جاعىندا ىرىقتى ورىنعا شىعاردى.

رەسەي قورعانىس مينيسترلىگىنىڭ مالىمەتىمەن قاتار، يراك قورعانىس مينيسترلىگى دە حابارلاما تاراتىپ، ءوز اۋە كەڭىستىگىنە يزرايل ۇشاقتارىنىڭ كىرمەگەنى تۋرالى ايتتى.

“The Qazaq Times”