تۇركيا پرەزيدەنتى رەجەپ تايىپ ەردوعان «يزرايل تەرروريست جانە جاۋلاپ الۋشى» - دەپ مالىمدەدى.

ادانا قالاسىندا ايماقتىق كونگرەسس وتىرىسىندا ءسوز سويلەگەن رەجەپ تايىپ ەردوعان يزرايلگە قاتىستى مالىمدەمە جاساعان. وندا ول: «يزرايل پاليستينالىقتارعا قارسى ادام توزگىسىز ساياسات جۇرگىزىپ وتىر. ءبىز جاۋلاپ الۋشى ەمەسپىز. يزرايل سەن تەرروريست جانە جاۋلاپ الۋشىسىڭ. تاريح سەندەردىڭ پاليستينا حالقىنا جاساعان قياناتتارىڭا كۋا. پاليستينا حالقى بۇنى ەش ۋاقىتتا ۇمىتپايدى. مەن يزرايل حالقى پرەمەر-مينيستر نەتانياحۋدىڭ ىستەپ وتىرعان ىسىنە الاڭداۋشىلىق بىلدىرەدى دەپ سەنەمىن. ساعان (نەتانياحۋدى مەڭزەپ) ءبىزدىڭ افريندەگى وپەراتسيامىز جونىندە ءسوز قوزعاۋدىڭ قاجەتى جوق. شەكتەن شىقپا! ءبىز وزىمىزبەن بىرگە تەك بەيبىتشىلىك، مادەنيەت، ماحاببات جانە تىنىشتىق الىپ كەلەمىز» - دەگەن.

ەستەرىڭىزگە سالايىق، 30 ناۋرىز كۇنى يزرايل مەن گازا سەكتورى شەكاراسىندا پاليستينالىقتار مەن يزرايل ارمياسى اراسىندا قاقتىعىس بولعان. سالدارىنان 14 پاليستينالىق كوز جۇمىپ، 1200-گە جۋىعى جاراقات العان. اتالمىش وقيعادان كەيىن پاليستينا ۇلتتىق اكىمشىلىگىنىڭ باسشىسى ماحمۋد ابباس 31 ناۋرىزدى «قارالى كۇن» دەپ جاريالاعان.

“The Qazaq Times”