وزبەكستان مەن تۇركىمەنستان شەكارا ماسەلەسىن رەتتەدى

26 ناۋرىز بەن 1 ءساۋىر ارالىعىندا تۇركمەنستاندا وزبەك-تۇرىكمەن ۇكىمەتارالىق كوميسسياسىنىڭ جۇمىس توبىنىڭ كەزەكتى وتىرىسى بولىپ ءوتتى. "اتالعان كەزدەسۋ تۇركىمەنستان مەن وزبەكستان اراسىنداعى مەملەكەتتىك شەكارانى دەماركاتسيالاۋ جانە جۇرگىزۋ ماسەلەسىنە باعىتالعان" ، - دەپ حابارلايدى وزبەكستان سىرتقى ىستەر مينيسترلىگىنىڭ ءباسپاسوز قىزمەتى.

كەزدەسۋ بارىسىندا وزبەك-تۇرىكمەن مەملەكەتتىك شەكاراسىنىڭ جەكەلەگەن بولىكتەرىندەگى اتقارىلعان توپوگراف-گەودەزيالىق ورتاق جۇمىستاردىڭ ناتيجەلەرى قارالىپ،  ونى 2018 جىلعا ارنالعان گرافيكتىك-جوسپار نەگىزىندە جالعاستىرۋ ءۇشىن كەلىسىمشارت جاسالدى. كەلىسسوز قورىتىندىسى بويىنشا كەلىسىمشارتقا قول قويىلعان.

وزدەرىڭىزگە بەلگىلى، حورەزم، كاشكاداريا جانە بۇحارا وبلىستارى، سونىمەن قاتار قاراقالپاقستان رەسپۋبليكاسى تۇركىمەنستانمەن شەكتەسەدى. ەكى ەل اراسىنداعى شەكارانىڭ جالپى ۇزىندىعى 1650 شاقىرىمدى قۇرايدى. وسى شەكاراعا قاتىستى ەكى ەل اراسىندا بىرقاتار ماسەلە ءالى ءوز شەشىمىن تاپپاي كەلگەن ەدى. ەندى ەكى ەل وكىلدەرى، الداعى جوسپارلارى ارقىلى بىرجاقتى شەشىمگە توقتاۋدان ءۇمىتتى.

“The Qazaq Times”