شابۋىلدان بۇلىنگەن شىعىس گۋتاداعى جاعداي. فوتو: VOA.

رەسەي قارۋلى كۇشتەرىنىڭ تاراتقان مالىمەتىنە قاراعاندا، الدىن الا قول جەتكىزگەن كەلىسىم بويىنشا، ءسۇريا كوتەرىلىسشىلەرى ءوز باقىلاۋىندا ۇستاپ تۇرعان سوڭعى اۋداننان شىعىپ كەتكەن. بۇل ءسۇريا ۇكىمەتىنىڭ قارۋلى شابۋىلدى باستاعان 6 اپتادان بەرى العاش رەت داماسك ماڭىنداعى ءوڭىردى تولىق باقىلاۋىنا الۋى بولدى. دەگەنمەن، ءبىر جارىم اي ىشىندە كەمىندە 1600 بەيبىت تۇرعىن قازا تاپتى. بۇل تۋرالى VOA اقپاراتتىق سايتى حابارلادى.

سۇرياداعى كوتەرىلىسشىلەر تارابى اتالعان حاباردى راستاپ مالىمدەمە جاساعان. دەگەنمەن، رەسەي تارابى ەۆاكۋاتسيانىڭ قاي ۋاقىتتا باستالاتىنى تۋرالى انىق مالىمەت بەرمەگەن. ءسۇريا رەجيمىنىڭ اۋە شابۋىلدارىنان نەشە مىڭداعان گۋتا تۇرعىندارى باسپاناسىن تاستاپ كەتۋگە ءماجبۇر بولعان ەدى. اتالعان ايماقتاعى الەۋمەتتىك جاعداي قيىنداي تۇسكەن.

ءسۇريا ۇكىمەتىنىڭ رەسمي مالىمدەمەسىندە ايتىلعانداي، شىعىس گۋتاداعى ۇكىمەتكە قارسى كۇشتەر اپتا سوڭىندا ءوڭىردى تاستاپ كەتە باستاعان. مالىمەتتە ولاردىڭ ەندىگى بەتالىسى يدليب ەكەنى ايتىلعان. ءسۇريا ۇكىمەتى اسكەري وپەراتسيالاردان زاقىمدالعان قالانى قالپىنا كەلتىرۋ ىستەرىن تەز ارادا باستايتىنىن دا العا تارتتى. دەگەنمەن، باسپاناسىنان ايىرىلعان مىڭداعان تۇرعىنداردى قاشان قالاعا قايتىپ ورالاتىنى تۋرالى انىق مالىمەت جوق.

“The Qazaq Times”