فوتو: worldbulletin.net

گەرمانيالىق ەكى پارتيا اراسىنداعى يسلام دىنىنە قاتىستى پىكىرتالاس نەمىس قوعامىن ەكىگە ءبولدى. "يسلام گەرمانياعا جات" دەگەن سوزدەرى ارقىلى قوعامدى ەكىگە بولگەن گەرمانيا ىشكى ىستەر ءمينيسترى حورست زەەحوفەردىڭ قاراپتان-قاراپ نەگە  مۇنداي پىكىر  ايتقانى ءالى تالقىلانۋدا.

جۋىردا، ياعني 14 ناۋرىزدا كانتسلەر مەركەل مەن مينيسترلەر كابينەتىنىڭ ءوز قىزمەتتەرىنە كىرىسكەندەرى بەلگىلى. وسىنداي ساياسي وزگەرىستەر كەزىندە باۆاريانىڭ پرەمەر-ءمينيسترى قىزمەتىن تاستاپ، ىشكى ىستەر ءمينيسترى رەتىندە بەرلينگە كەلگەن زەەحوفەر، 15 ناۋرىز كۇنى "Bild" باسىلىمىنا بەرگەن سۇحباتىندا "يسلام گەرمانياعا جات" دەپ، ەلدى دۇرلىكتىرگەن ەدى.

ء"بىر قادام دا كەرى شەگىنبەيمىن"

زەەحوفەردىڭ بۇل سوزىنە مەركەل دەرەۋ جاۋاپ قايتاردى. "گەرمانيادا مۇسىلماندارعا دا، ولاردىڭ ءدىنى يسلامعا دا ورىن بار" ، - دەگەن مەركەل بۇنىمەن شەكتەلمەدى، 21 ناۋرىزداعى ۇكىمەتتىك وتىرىسىندا اتالعان داۋلى پىكىرگە قاتىستى ماسەلەنى قايتادان كۇن تارتىبىنە شىعارىپ، تاعى دا "يسلام گەرمانياعا جات ەمەس" ، - دەپ، شەگەلەدى. ونىڭ مينيسترلەر وتىرىسىندا وسى ماسەلەنى قايتا قوزعاعانىنا اشۋلانعان زەەحوفەر، "يسلام گەرمانياعا جات" دەگەن ساياسي ۇستانىمىمنان ءبىر قادام دا كەرى شەگىنبەيمىن", - دەپ، العان بەتىنەن قايتپايتىنىن كورسەتتى. ەكى پارتيا باسشىسى اراسىندا تۇتانعان بۇل تارتىس تۋرالى نەمىس اقپارات قۇرالدارىندا وتە كوپ جازىلىپ، گەرمانيا قوعامى "مەركەلدى قۇپتاۋشىلار" جانە "زەەحوفەردى جاقتاۋشىلار" بولىپ  ەكىگە ءبولىندى.

اتالعان داۋلى پىكىرگە گەرمانيانىڭ ەكونوميكا ءمينيسترى پەتەر التمايەر مەن سوتسال-دەموكراتيالىق پارتياسى باسشىسىنىڭ ورىنباسارى مالۋ درەيەر دە بەيتاراپ قالمادى. التمايەر " Passauer Neue Presse " باسىلىمىنا بەرگەن سۇحباتىندا: "وتە اۋىر شارتتاردا جۇمىس ىستەگەندەرىنە قاراماستان، كۇن سايىن تاڭەرتەڭ جۇمىسىنا اسىعىپ تۇراتىن مۇسىلمان- كەلىمسەكتەر ءبىزدىڭ قوعامنىڭ ءبىر بولشەگىنە اينالدى. ولار سونىمەن قاتار، گەرمانيا ەكونوميكاسىنىڭ دامۋىنا دا ۇلەس قوسۋدا" ، - دەدى. كوپتەگەن مۇسىلمانداردىڭ ۇزاق ۋاقىتتان بەرى، ەلدىڭ ىشكى زاڭىنا باعىنىپ، بەيبىت تۇردە ءومىر ءسۇرىپ جۇرگەن گەرمانيادا يسلام ءدىنىنىڭ گەرمانياعا جات ەمەس ەكەنىن ايتقان المايەر،  مەركەلدىڭ ءسوزىن سويلەپ، "مەن دە سونداي پىكىردەمىن" ،- دەدى. ال، درەيەر زەەحوفەردى يسلامدى يسلام تەررورلىق ۇيىمىمەن شاتاستىرىپ ءجۇر جانە وسىنداي قيسىنسىز پىكىرلەرىمەن "اتىن شىعارىپ، بەدەل جيناعىسى كەلەدى" ، - دەپ ايىپتادى.

“The Qazaq Times”