رەسەيدىڭ اقش-تاعى كونسۋلدىعى جابىلماق. فوتو: WSJ.

اقش ۇكىمەتىنىڭ دۇيسەنبى كۇنى جاريالاعان شەشىمىندە، تىڭشىلىق جاسادى دەگەن ايىپپەن 60 رەسەيلىك ديپلوماتتى ءبىر اپتا ىشىندە قۇراما شتات تەرريتورياسىنان شىعىپ كەتۋگە بۇيىردى. اق ءۇي مالىمەتى بۇل شەشىمدى راستاي وتىرىپ، فرانتسيا، گەرمانيا، پولشانى قامتىعان كەم دەگەندە 22 ەل 137 رەسەيلىكتى ەلىنەن قۋدى. بۇل تۋرالى The Wall Street Journal باسىلىمى حابارلادى.

حابارعا قاراعاندا، اق ءۇي اتاپ وتكەن ەلدەردىڭ تىزىمگە اۋستراليا (اۆستراليا)  كىرمەگەن. ال اۋستراليا تارابىنىڭ بۇگىن جاريالاعان مالىمدەمەسىندە، سالاۋاتى كورسەتىلمەگەن ەكى رەسەيلىك بارلاۋ قىزمەتكەرىن ەلدەن شىعارعانىن ايتقان.

اقش مەملەكەتتىك دەپارتامەنتىنىڭ لاۋازىمدى تۇلعاسى بۇل تۋرالى تۇسىنىك بەرگەندە: «اقش ۇكىمەتىنىڭ ەلدەگى رەسەي ەلشىلىگىنىڭ ءبىرىن جابۋ تۋرالى شەشىمى – ماسكەۋدىڭ حالىقارالىق قۇقىقتى بۇزۋىنا بەرگەن جاۋابى. وعان قوسا ۇلىبريتانياداعى رەسەيلىك بۇرىنعى بارلاۋ قىزمەتكەرى مەن ونىڭ قىزىنا جاسالعان شابۋىلدىڭ دا جاۋاپ دەۋگە بولادى»، – دەگەن. اقش جوعارى لاۋازىمدىلارىنىڭ ءبىرى رەسەيدىڭ ماقساتتى تۇردە تۇراقسىزدىق تۋدىرۋ جانە ارانداتۋ ىسىمەن اينالىسىپ كەلە جاتقانىن سىنعا العان.

BBC-ءدىڭ بۇل تۋرالى حابارىندا اقش پەن ەۋروپا ەلدەرىنەن قۋىلعان رەسەيلىك بارلاۋ قىزمەتكەرلەرى مەن ديپلوماتتاردىڭ سانىن انىقتاپ كورسەتكەن. ايتالىق: اقش-تان 60, فرانتسيا 4, گەرمانيا 4, پولشا 4, چەحيا 3, ليتۆا 3, دانيا 2, نيدەرلاندى 2, يتاليا 2, يسپانيا 2 ، ەستونيادان، حورۆاتيا، فينليانديا، ۆەنگريا، لاتۆيا، رۋمىنيا، شۆەتسيا ەلدەرى جەكە-جەكە ءبىر-ءبىر رەسەيلىك ازاماتتى ەلىنەن شىعاردى. ال، ەۋروپا ەلدەرى اراسىنان ۋكراينا 13 رەسەيلىكتى قۋىپ كوش باستادى. البانيا 2, كانادا 4, نورۆەگيا 1 رەسەيلىكتى شەكاراسىنان شىعاردى.

دەگەنمەن، باتىس ەلدەرىنىڭ رەسەيگە جاساعان بۇل قادامدارى ماسكەۋ بيلىگىن رايىنان قايتارا الماي وتىر. كرەمل تارابى بۇرىنعى رەسەيلىك بارلاۋ اگەنتتىنىڭ ولىمىنە ەش قاتىسىمىز جوق دەۋدەن ارى اسپادى. ءوز كەزەگىندە رەسەي دە شەتەلدىك ديپلوماتتاردى شىعاراتىنىن مالىمدەگەن.

 “The Qazaq Times”