بۇگىن تالدىقورعان قالاسىنداعى «جاستار» سپورت سارايى اۋماعى مەن «جاستار» مادەني-دەمالىس ساياباعىندا ءاز ناۋرىز مەرەكەسىنە وراي وبلىس اكىمى اماندىق باتالوۆتىڭ قاتىسۋىمەن «ۇلتتىق جاڭعىرۋ مەيرامى – ناۋرىز!» اتتى مەرەكەلىك شارالار ءوتتى. كوپشىلىككە باۋىرساق تاراتىلىپ، ناۋرىز كوجە ۇسىنىلدى،كوڭىلدى ويىندار، سپورتتىق جارىستار، ءتۇرلى كورمەلەر ۇيىمداستىرىلدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

مەرەكە الدىمەن «بۇلاق كورسەڭ، كوزىن اش» دەگەن تامسىلمەن قالا سىرتىنداعى بۇلاقتىڭ كوزىن اشۋدان باستالدى. «جاستار» سپورت سارايىنىڭ اۋماعىندا قاز قاتار تىگىلگەن اق شاڭقان كيىز ۇيلەر «ناۋرىز اۋىلىن» قۇراپ، ۇيلەردىڭ الدىندا قازاق حالقىنىڭ سالت-داستۇرلەرىنەن كورىنىستەر قويىلىپ، ءان مەن جىردان شاشۋ شاشىلدى، اق تىلەكتەر ايتىلىپ، باتا بەرىلدى. قولونەر بۇيىمدارىنان، كوركەمسۋرەتتەن كورمەلەر قويىلىپ، قازاقشا كۇرەس، كىر تاسىن كوتەرۋ، ارقان تارتىس، اسىق سياقتى ۇلتتىق ويىندار وينالدى. ەتنومادەني ورتالىقتاردىڭ دا كورمەسى، ۇلتتىق تاعامدارى ۇسىنىلىپ، شاعىن كونتسەرتتەرى قويىلدى. تسيرك ونەرپازدارى سان قيلى ونەرلەرىن پاش ەتتى.

 

وبلىس باسشىسى اقساقالدارمەن، «جاسىل ەل» جاساعىنىڭ مۇشەلەرىمەن بىرگە ساياباق ىشىنە اعاش ەكتى.

ساياباق ساحناسىندا ب. ريموۆا اتىنداعى دراما تەاترىنىڭ، وبلىستىق ءسۇيىنباي اتىنداعى فيلارمونيانىڭ جانە باسقا دا ونەر ۇجىمدارىنىڭ قاتىسۋىمەن «كۇلىمدە، ناۋرىز، كۇلىمدە!» اتتى مۋزىكالىق-حورەوگرافيالىق كورىنىس قويىلدى. وندا تابيعاتتىڭ ويانۋى سۋرەتتەلىپ، ءازىل اندەر، ناۋرىز جىرى، ناۋرىز باتاسى ايتىلدى.

سالتاناتتى مەرەكەدە ءسوز سويلەگەن وبلىس اكىمى اماندىق باتالوۆەلباسىنىڭ «پرەزيدەنتتىڭ 5 الەۋمەتتىك جوباسى» ۇندەۋىنىڭ حالىققا تىڭ سەرپىن بەرگەنىن اتاپ ءوتىپ:

- ۇلىستىڭ ۇلى كۇنى، جاقسىلىقتىڭ جارقىن مەرەكەسى، جىل باسى – ناۋرىز مەيرامى  قۇتتى بولسىن!ۇلىس وڭ، اق مول بولسىن! قازىنالى قارتتار، جالىندى جاستار،  باقىتتى سابيلەرىمىز امان بولسىن! كۇللى  شىعىس جۇرتىنا ورتاق – ناۋرىز مەرەكەسىنىڭ تاريحى تىم تەرەڭدە جاتىر. حالقىمىز ۇلىستىڭ ۇلى كۇنىندە – جاڭا جىلعا ۇلكەن ءۇمىت ارتادى. سەبەبى ناۋرىز ايى جاڭارۋ مەن جاڭا ءىستىڭ، ىرىc  پەن ىنتىماقتىڭ التىن ارقاۋى سانالعان. بەرەكە مەن بىرلىكتىڭ باستاۋى بولعان بۇل مەرەكەدە بارشا جەتىسۋلىقتارعا، ءار شاڭىراققا باقىت، قۋانىش تىلەيمىن. تاۋەلسىزدىك تۇعىرى بەرىك بولىپ، ەل ابىرويى ارتا بەسىن! – دەدى ءوز قۇتتىقتاۋىندا.

مۇنان سوڭ وبلىس اكىمى ا. باتالوۆ جەتىسۋلىقتاردىڭ اتىنان قازاق عارىشكەرى، حالىق قاھارمانى، اسكەري-اۋە كۇشتەرىنىڭ گەنەرال-مايورى ايدىن ايىمبەتوۆتى قۇتتىقتاپ، وعان«الماتى وبلىسىنىڭ قۇرمەتتى ازاماتى» اتاعىن رەسمي تۇردە تابىستادى.

مەرەكە ءسۇيىنباي اتىنداعى وبلىستىق فيلارمونيانىڭ، «تالدىقورعان اۋەندەرى» فولكلورلىق-ەتنوگرافيالىق ءانسامبلىنىڭ جانە قازاق ەستراداسى ونەرپازدارىنىڭ كونتسەرتىمەن جالعاستى.

اتاپ وتسەك، وسى كۇنى «تالدىقورعان» يپپودرومىندا كوكپار جارىسى ءوتتى. ال كەشكىلىك «جاستار» ساياباعىندا بي كەشى ۇيىمداستىرىلادى.

“The Qazaq Times”