كۇنى كەشە ساۋد ارابيا حانزاداسى مۇحاممەد بين سەلمان ۆاشينگتوندا اقش پرەزيدەنتى دونالد ترامپپەن كەزدەسكەن بولاتىن. كەزدەسۋ بارىسىندا ترامپ ساۋد ارابياسىنا قارۋ ساتۋ ءىسىنىڭ اقش ازاماتتارى ءۇشىن قانشالىقتى پايدالى بولاتىندىعى مەن ونىڭ قانشالىقتى ۇلكەن مۇمكىندىكتەر تۋدىراتىندىعى تۋرالى دەرەكتەر كەلتىرىلگەن كولەمدى سۋرەت كورسەتتى. نەگە ەكەنى بەلگىسىز، ترامپ كارتينالاردى كورسەتىپ جاتقاندا حانزادا سەلماننىڭ ءتۇرى بۇزىلىپ كەتتى. مۇنداي ءساتتى كوزدەن تاسا قىلمايتىن قىراعى ساراپشىلار مەن ساياساتكەرلەر حانزادا سەلماننىڭ بۇل كۇيىن اقش پرەزيدەنتىنىڭ مۇنداي قۇپيا تولى اقپاراتپەن بولىسەتىنىن كۇتپەگەنىمەن بايلانىستىرۋدا.

اتالعان كەزدەسۋدە ترامپ ءار-رياد ۇكىمەتىنىڭ اقش-تان الاتىن قۇنى 12 ملرد. دوللار تۇراتىن قارۋ-جاراق پەن ولاردىڭ اقش-قا تيگىزەتىن پايداسى تۋرالى كەڭىنەن اڭگىمەلەدى. ول، قارۋ وندىرىسىنە بايلانىستى اقش-تا قوسىمشا 40 مىڭ جۇمىس ورنى پايدا بولاتىنىن ايتتى. ەكىجاقتى كەزدەسۋدە ساۋد ارابياسىنىڭ اقش-تان سوڭعى ۋاقىتتا ميللاردتاعان دوللارلىق قارۋ العانىن جانە سول ءىسىن ءالى دە جالعاستىرىپ كەلە جاتقانىن ايتقان ترامپ، اقپارات قۇرالدارىنا سوڭعى كەزەڭدەردە ساۋد ارابياسىنا ساتىلعان 12, 5 ملرد. دوللارلىق قارۋلار تۋرالى دەرەكتەر جازىلعان سۋرەتتى دا كورسەتتى. ادەتتە ايتارىن ايتىپ قالاتىن سىرباز حانزادا بۇل جولى ەشتەڭە ايتپاعانمەن، نە بولسا ءبىر ساۋساعىن ىشىنە بۇگىپ قالعانى انىق. سەبەبى، ونىڭ ءىس-ارەكەتىنەن اقش پرەزيدەنتىنىڭ قىلىعىن جاراتپاي قالعانى اشىق ءبىلىنىپ-اق تۇر. ايتا كەتۋ كەرەك، ترامپ ۇكىمەتى مەن ساۋد ارابياسىمەن سۋپەر-قارۋ ساۋداسىنا قاتىستى كەلىسىمشارتقا قول قويىلعانى بارىمىزگە بەلگىلى. ال مۇنشالىقتى ەگجەي-تەگجەيلى دەرەك كوپشىلىك ءۇشىن توسىن اقپاراتقا اينالىپ وتىر.

“The Qazaq Times”