وڭتۇستىك كورەيادا ءتورتىنشى رەت بۇرىنعى پرەزيدەنت جەمقورلىقپەن ايىپتالدى

وڭتۇستىك كورەيا پروكۋراتۋراسى تاعى ءبىر بۇرىنعى پرەزيدەنتكە قىلمىستىق ايىپ تاقتى. وتكەن اپتانىڭ سوڭىندا وڭتۇستىك كورەيا پروكۋراتۋراسى  لي ميۋڭ باكتى (Lee Myung-bak) 21 ساعاتتىق تەرگەۋدەن كەيىن تۇتقىنعا الۋعا بۇيرىق بەردى. لي ميۋڭ باك 2008-2013 جىلدار ارالىعىندا وڭتۇستىك كورەيا پرەزيدەنتى بولىپ قىزمەت اتقارعان. بۇل تۋرالى Yonhap اگەنتتىگىنە سىلتەمە جاساي وتىرىپ «شينلاڭ» اقپاراتتىق سايتى حابارلادى.

اتالعان ەلدىڭ پروكۋراتۋراسى بۇرىنعى پرەزيدەنت ميۋڭ باكتى كاسىپكەرلەر مەن لاۋازىمدىلاردان 10,3 ملن اقش دوللارى كولەمىندە پارا العان دەگەن ايىپپەن تۇتقىنداۋعا بۇيرىق بەردى. سونداي-اق، تۋعان اعاسى لي سان ۋكتىڭ اتىنا تىركەلگەن «DAS» كومپانياسىنىڭ تابىسى ءۇشىن بيلىگىن اسىرا پايدالانعان دەگەن ايىپ تا قوسىلعان.

لي ميۋڭ باك اتالعان ايىپتاۋلاردى تەرىسكە شىعاردى. الايدا، ەل پروكۋراتۋراسى سوتتا ەكى بىردەي ايىپتى ارقالاعان بۇرىنعى ەل پرەزيدەنتىنە 30 جىلدىق قاماۋ جازاسىن سۇرايتىنىن ءبىلدىردى.

لي ميۋڭ باكتان كەيىن پرەزيدەنتتىك تاققا شىققان پاك كىن حە دە سىبايلاس جەمقورلىق، بيلىگىن اسىرا سىلتەۋ دەگەن ايىپتارمەن قىزمەتىنەن الىنىپ، قاماۋ جازاسىنا ۇكىم ەتىلگەن بولاتىن.

ەگەر ميۋڭ باكتىڭ قىلمىسى انىقتالىپ، سوت پروكۋراتۋرانىڭ دەگەنىنە شەشسە، ول اتالعان ەلدە ايىپقا تارتىلىپ، جازالانعان ءتورتىنشى باسشى بولماق.

“The Qazaq Times”