F/A-18F Super Hornet. فوتو: Airliners.net.

اقش-تىڭ تەڭىز اسكەري كۇشتەرىنە تيەسىلى F/A-18F Super Hornet اتتى سوعىس ۇشاعى اپاتقا ۇشىراپ، 2 ۇشقىش قازا تاپتى. بۇل تۋرالى «شينلاڭ» اقپاراتتىق سايتى حابارلادى.

اقش-تىڭ اتلانت مۇحيتىنداعى باس شتابى جاساعان مالىمدەمەدە، اسكەري تەڭىز كۇشتەرىنە تيەسىلى سوعىس ۇشاعى فلوريداداعى Boca Chica اسكەري بازاسىنداعى ءبىر رەتكى وقۋ-جاتتىعۋ كەزىندە قۇلاعان.  

مالىمەتكە قاراعاندا، اپاتتى جاعداي سوعىس ۇشاعى قونۋعا دايىندالعان كەزدە بولعان. ۇشاقتاعى ەكى ۇشقىش وزدەرىن كەڭىستىككە لاقتىرعان. الايدا، ۇشقىشتاردىڭ ءمايىتى بازاعا 2 شاقىرىم قاشىقتىقتاعى سۋ ايدىنىنان تابىلعان.

سوڭعى جىلدارى اقش-تىڭ  F/A-18F تۇرىندەگى سوعىس ۇشاقتارى ءجيى اپاتقا ۇشىراۋدا. مالىمەتتەرگە قاراعاندا، اتالعان سوعىس ۇشاعىنداعى كەيبىر تەحنيكالىق اقاۋلار ۇشقىشتارعا كوپ كەدەرگى كەلتىرەدى. كەيدە كابينا ىشىندە وتتەگى جەتىسپەۋ سالدارىنان ۇشقىشتاردىڭ تۇنشىعاتىنى، ونىڭ سوڭى اپاتتى جاعدايعا الىپ كەلەتىنى دە ايتىلادى.  

“The Qazaq Times”