تۇركيا ارمياسى افرين ايماعىنان كەيىن يراكتىڭ سولتۇستىگىنە سوعىس اشۋى مۇمكىن

تۇركيا پرەزيدەنتى رەجەپ تايىپ ەردوعان كەشە انكارادا وتكەن جينالىستا مالىمدەمە جاساپ، تۇركيا ارمياسى سۇرياداعى افرين قالاسىنا جەتكەنىن مالىمدەدى. ول سوزىندە تۇرىك قارۋلى كۇشتەرىنىڭ قازىرگە دەيىن تەررورلىق توپتىڭ 3 مىڭ 444 مۇشەسىنىڭ كوزىن جويعانىن ايتا كەلىپ، افرين قالاسىنىڭ تەز ارادا ازات ەتىلىپ، ايماقتىڭ تولىقتاي تەررورلىق توپتان تازارتىلۋىن ءۇمىت ەتكەن. بۇل تۋرالى «انادولى» اقپاراتتىق اگەنتتىگى حابارلادى.

ەردوعان سوزىندە: «افرينگە جاقىندادىق، كەشكە دەيىن افرين تورلىعىمەن ازات ەتىلسە دەپ تىلەيمىن. ارينە، بۇل وڭاي بولمايدى. قاشقان تەررورلىق توپتىڭ مۇشەلەرى بەيبىت تۇرعىنداردى قالقان ەتىپ پايدالانۋدا. ءبىز باتىس ەلدەرى سەكىلدى جازىقسىز تۇرعىنداردى ولتىرمەيمىز»، – دەدى.

ەردوعان جانە افرين ايماعىنداعى سوعىس تۋرالى توقتالىپ، تاۋلاردى تەسىپ وتكىزىلگەن جەر استى جولدارى بار ەكەنىن ايتتى. «كورىپ وتىرسىزدار، بۇل تۋننەلدەردى جاساعان تەك تەررورلىق توپ قانا ما؟ بۇل ولاردىڭ وداقتاستارى بار ەكەنىن كورسەتەدى»، – دەدى.

وسىلارمەن بىرگە تۇركيا پرەزيدەنتى ءسۇريانىڭ سولتۇستىگىندەگى قارۋلى وپەراتسيادان كەيىن، اسكەري ارەكەتتەر يراكتىڭ سولتۇستىگىندە دە جالعاسۋى مۇمكىن ەكەنىن ايتىپ ءوتتى. ايتالىق، ەفرات وزەنىنىڭ شىعىسىنان تارتىپ، يراك پەن تۇركيانىڭ شەكاراسىن قارۋلى توپتاردان تازارتاتىنىن ءبىلدىردى.

“The Qazaq Times”