فوتو: گازەتا.رۋ

سوڭعى 4 جىلدا الەم بويىنشا قارۋ-جاراق ساۋداسى 10 پايىزعا ءوستى – دەپ حابارلايدى Forbes جۋرنالى.

جاھان پروبلەمالارىن زەرتتەيتىن ستوكگولم ينستيتۋتى عالىمدارىنىڭ مالىمەتىنشە، 2013-1017 جىلدار ارالىعىندا قارۋ-جاراق ساۋداسى 2008-2012 جىلدارمەن سالىستىرعاندا 10 پايىزعا ارتقان. قارۋ-جاراق ساۋداسىنىڭ باسىم كوپشىلىگى ازيا مەن تاياۋ شىعىس اۋماعىندا جاسالعان. ال بۇعان دەيىن كوش باستاپ كەلگەن افريكا، امەريكا جانە ەۋروپادا بۇل كورسەتكىش كەرسىنشە ازايعان.

جالپى، قارۋ-جاراق ساۋداسىنىڭ باسىم كوپشىلىگى اقش، رەسەي، فرانتسيا، گەرمانيا جانە قىتايعا تيەسىلى. ولار الەمدە ساۋدالانىپ جاتقان قارۋ-جاراقتىڭ 74 پايىزىنا يە. سوڭعى 10 جىلدا قارۋ-جاراق پەن اسكەري تەحنيكانىڭ 32 پايىزىن تاياۋ شىعىس ەلدەرى ساتىپ العان. ال 2013-2017 جىلدار ارالىعىندا جەكەلەگەن ەلدەر اراسىندا اسكەري تەحنيكا مەن قارۋ-جاراق ساتىپ الۋدا ءۇندىستان كوش باستاپ تۇر. ونىڭ ەنشىسىنە الەمدىك قارۋ-جاراق يمپورتىنىڭ 12 پايىزى تيەسىلى.

“The Qazaq Times”