كوەن ترامپ كەڭسەسىندە. فوتو: CNN Money.

قىزمەتكە تاعايىندالعانىنا 14 اي تولماي جاتىپ، اق ءۇيدىڭ ۇلتتىق ەكونوميكا كەڭەسىنىڭ توراعاسى گاري كوەن (Gary Cohn) وتستاۆكاعا كەتتى. بۇل تۋرالى «WSJ» باسىلىمى حابارلادى.

كوەن مالىمدەمەسىندە: «ءوز ەلىنە ەڭبەك ەتۋ ۇلكەن داڭق.  ماعان وسىنداي وراي بەرگەنى ءۇشىن پرەزيدەنت مىرزاعا العىسىمدى بىلدىرەمىن. امەريكالىقتارعا پايدالى ۇلتتىق ەكونوميكالىق ساياسات جاسالىپ جاتىر، اسىرەسە تاريحي تۇرعىدا جاڭا سالىق رەفورماسى ىسكە اسۋدا. مەن ترامپ پەن ونىڭ ۇكىمەتىنە ساتتىلىك تىلەيمىن»، – دەدى.

ترامپ ءوز كەزەگىندە كوەندى  ەكونوميكالىق كەڭەسشى رەتىندە ىسكەر تۇلعا، ءوز سالاسىنداعى «سيرەك كەزدەسەتىن تالانت يەسى» دەپ ماقتاعان ەدى. ءارى ونىڭ امەريكالىقتار ءۇشىن جاساعان ادال قىزمەتىنە العىس ءبىلدىردى. اق ءۇيدىڭ شتاب باستىعى دجون كەللي دە كوەن تۋرالى العىس جانە ماقتاۋ سوزدەر ايتتى.

دەگەنمەن، كوەننىڭ جۇمىستان كەتۋىنە ترامپ ۇكىمەتىنىڭ جاقىندا جاريالاعان جاڭا ساياساتى سەبەپ بولدى.  وتكەن اپتادا اقش پرەزيدەنتى دونالد ترامپ بولات پەن اليۋميني يمپورتىنا جاڭا تاريفتەر ەنگىزۋ تۋرالى شەشىم قابىلدادى. بۇعان ۇلتتىق ەكونوميكا كەڭەسىنىڭ توراعاسى كوەن قارسىلىق بىلدىرگەن ەدى.

“The Qazaq Times”