ەكى كورەيا قاتىناسىنىڭ دامۋى اقش پەن وڭتۇستىك كورەيا اراسىنا جىك سالا ما؟

سولتۇستىك كورەيانىڭ رەسمي اقپارات قۇرالدارى ەلدىڭ ەڭ جوعارى باسشىسى كيم جوڭ ۋننىڭ (كيم چەن ىن/Kim Jong Un) وڭتۇستىك كورەيامەن مامىلەنى جاقسارتۋعا نيەت قىلىپ وتىرعانىن مالىمدەدى. BBC حابارىنا قاراعاندا، دۇيسەنبى كۇنى كحدر تارابى پيوڭياڭدا (پحەنيان) وڭتۇستىك كورەيانىڭ جوعارى دەڭگەيدەگى دەلەگاتسيا وكىلدەرىن قارسى الۋ ءۇشىن ارنايى كەشكى قوناقاسى وتكىزگەن. كيم جوڭ ۋن وڭتۇستىك كورەيا قاۋىپسىزدىك كەڭەسىنىڭ حاتشىسىن جىلى جۇزبەن قارسى العان.

امەريكالىق WSJ باسىلىمى، كەشكى استىڭ  ءتورت ساعاتتان استام ۋاقىتقا سوزىلعانىن ايتادى. وعان قوسا، وڭتۇستىك كورەيا پرەزيدەنت سارايىنىڭ رەسمي مالىمدەمەسىندە: «پيوڭچاڭ قىسقى وليمپياداسىنىڭ ەكى ەل اراسىنداعى ديپلوماتيالىق توڭدى ءجىبىتتى. ال بۇل رەتكى كەزدەسۋ وڭتۇستىك جانە سولتۇستىك كورەيا دوستىق قارىم-قاتىناسىنىڭ جاڭا داۋىرگە كىرگەنىن بىلدىرەدى»، –دەپ كورسەتەدى.

سولتۇستىك كورەيانىڭ رەسمي باسىلىمدارىندا، ەكى ەلدىڭ لاۋازىمدى تۇلعالارىنىڭ كەزدەسۋىندە «قاناعاتتانارلىق كەلىسىمگە قول جەتكىزدىك» دەلىنگەن. اتالعان باسىلىمدار كيم جوڭ ۋننىڭ وڭتۇستىك كورەيا وكىلىمەن كۇلە امانداسىپ، ءازىل-قالجىڭ ايتىپ داستارحان باسىندا جىلى سويلەسكەنىن جازۋدا.

اقش قورعانىس مينيسترلىگىنىڭ ءباسپاسوز حاتشىسى روب ماننيڭ مالىمدەمەسىندە، اقش رەسميلەرى ەكى كورەيا اراسىنداعى كەلىسسوزدەرگە «سالقىنقاندى كوزقاراستا» ەكەنىن، بىراق، ەكى كورەيا قاتىناسىنىڭ دامۋى اقش پەن وڭتۇستىك كورەيانىڭ ارا-قاتىناسىنا نۇقسان كەلتىرەدى دەپ الاڭدامايتىنىن ءبىلدىردى.

دەگەنمەن، كەيبىر ساراپشىلار ەكى كورەيا اراسىنداعى كەلىسسوز دامىعان سايىن ۋاشينگتون مەن سەۋل اراسى الشاقتاي ءتۇسۋى مۇمكىن دەگەن كوزقاراستا. ۋاشينگتونداعى (ۆاشينگتون) ۆيلسون حالىقارالىق قاتىناستاردى زەرتتەۋ ورتالىعى (Wilson International Scholars Center) ازيا جوباسىنىڭ جەتەكشىسى ابراحام دانماركتىڭ (Abraham Denmark) سوزىندە: «سولتۇستىك كورەيا ماسەلەسىندە اقش پەن وڭتۇستىك كورەيا بىراۋىزدىلىقتى ساقتاي الا ما؟ – مىنە بۇل وسى ماسەلەدەگى ەڭ نەگىزگى ءتۇيىن»، – دەگەن ويىن ايتادى.

وڭتۇستىك كورەيا ۇكىمەتىنىڭ مالىمدەمەسىندە، كحدر-عا جىبەرگەن دەلەگاتسيانىڭ باستى مىندەتى – سولتۇستىك كورەيا يادرولىق ماسەلەسى مەن ەكى ەل اراسىنداعى ىنتىماقتاستىقتى كەڭەسۋ دەپ كورسەتەدى. الايدا، سولتۇستىك كورەيانىڭ بىردەن يادرولىق باعدارلامادان باس تارتىپ، وڭتۇستىكپەن دوستىق قاتىناس ورناتا قويۋى ەكىتالاي. كەلىسسوزدىڭ ناقتى قانداي ناتيجەگە جەتكەنى تۋرالى ەكى ەل ۇكىمەتى ءالى دە تولىق مالىمەت تاراتپادى.

BBC ەكى ەل اراسىندا كەيبىر تاقىرىپتاردا بىراۋىزدىلىققا كەلگەن بولۋى مۇمكىن دەپ بولجايدى. يادرولىق ماسەلە تۋرالى سويلەسۋلەردىڭ ناتيجەسى بەيمالىم. الداعى ۋاقىتتا الەم ەلدەرى وڭتۇستىك كورەيا پرەزيدەنتى ۋاشينگتون مەن پيوڭياڭدى كەلىسسوزگە شاقىرا الا ما دەگەنگە نازار اۋداراتىنى انىق.

“The Qazaq Times”