يران ۇكىمەتى اقش دوللارىنىڭ قولدانىلۋىنا جاڭا شەكتەۋلەر قويدى. ەندى امەريكالىق ۆاليۋتانى يمپورت جاساۋ كەزىندە پايدالانۋعا مۇلدە تىيىم سالىندى.

يراندىق Financial Tribune باسىلىمىنىڭ مالىمەتىنە قاراعاندا دوللارمەن ەسەپ جۇرگىزىلەتىن تاۋارلاردى جەتكىزۋگە ارنالعان كەز-كەلگەن تاپسىرىستار نەمەسە  يمپورتتىق دەكلاراتسيالار يراننىڭ كەدەن ورگاندارىمەن جۇزەگە اسىرىلمايدى.

يراننىڭ ورتالىق بانكىنىڭ ۆاليۋتالىق وپەراتسيالار جانە ساياسات دەپارتامەنتىنىڭ ديرەكتورى مەحدي كاسرەيپۋردىڭ سوزىنشە، جاڭا ەرەجەلەر ساۋدا وپەراتسيالارىنا ەش اسەر ەتپەۋى كەرەك، سەبەبى امەريكالىق ۆاليۋتامەن ساۋدا جۇرگىزۋ ونسىز دا  شەكتەۋلى بولعان. ءتىپتى اقش سانكتسيالارىنا بايلانىستى، جەرگىلىكتى بانكتەر دوللارمەن وپەراتسيا جۇرگىزە الماعان.

ال ساراپشىلار بولسا يراننىڭ دوللاردان باس تارتۋىن ۇلتتىق ۆاليۋتا قۇنىنىڭ تومەندەپ كەتۋىمەن تۇسىندىرەدى. بيىل يران ريالىنىڭ دوللارعا شاققانداعى باعامى 8 پايىزعا تومەندەگەن. قازىرگى ۋاقىتتا ءبىر دوللار 37 355 ريالعا تەڭ.

ەندى تاۋار يمپورتتاۋشىلار دوللاردىڭ ورنىنا ەۋرونى نەمەسە ۇلتتىق ۆاليۋتانى قولدانا الادى.

“The Qazaq Times”