وڭتۇستىك كورەيانىڭ جەتەكشىلەرى اقش-تى سولتۇستىك كورەيامەن كەلىسسوز جۇرگىزۋدىڭ العىشارتىن جۇمسارتۋعا شاقىردى. وڭتۇستىك كورەيا اقش-تىڭ كەلىسسوزدىڭ العىشارتىن قاتاڭ كۇيدە ۇستاۋى سەۋل تارابىنىڭ سولتۇستىك كورەيامەن كەلىسسوز جۇرگىزۋگە جاساپ جاتقان قۇلشىنىستارىن جوققا شىعارۋى مۇمكىن دەپ الاڭدايدى. بۇل تۋرالى WSJ باسىلىمى حابارلادى.

وڭتۇستىك كورەيا پرەزيدەنتى ءمۇن جاين (Moon Jae-in) دۇيسەنبى كۇنى قىتاي باسشىسى شي ءجينپيڭنىڭ ارنايى وكىلىمەن كەزدەسكەن كەزدە: «اقش تارابى كەلىسسوزدىڭ تابالدىرىعىن الاسارتىپ، سولتۇستىك كورەيا يادرولىق قارۋدان ءوز ەركىمەن باس تارتۋى كەرەك»، - دەگەن. بۇنى سەۋلدەگى پرەزيدەنت سارايىنىڭ ارنايى وكىلى ءوزىنىڭ مالىمدەمەسىندە اتاپ ءوتتى.

مالىمەتكە قاراعاندا ءمۇن جايىن دۇيسەنبى كۇنى قىتاي توراعاسىنىڭ ورىنباسارى ليۋ ياندوڭمەن كەزدەسكەن. كەزدەسۋدە وڭتۇستىك كورەيا باسشىسى كوكتەم كەزىندە وتەتىن اقش-وڭتۇستىك كورەيا بىرلەسكەن اسكەري جاتتىعۋلاردىڭ سالماعىن جەڭىلدەتۋدى اقىلداسىپ جاتقانىن دا ايتىپ وتكەن.

اقش وسىعان دەيىن سولتۇستىك كورەيامەن كەلىسسوزدىڭ تەك يادرولىق قارۋدى جوعالتۋ تۋراسىندا عانا وتكىزەتىنىن ايتىپ كەلگەن. ال سولتۇستىك كورەيا بولسا يادرولىق قارۋدان باس تارتپايتىنىن، سونىمەن قوسا اقش-تى ءوزىنىڭ يادرولىق مارتەبەسىن مويىنداۋى كەرەك دەپ كەلگەن. مۇلدە توعىسپايتىن وسى مۇددەلەر كورەي تۇبەگى قايشىلىعىن ۋشىقتىرىپ كەلىپ ەدى. وڭتۇستىك كورەيا بۇل رەتتەن پيوڭچاڭ وليمپياداسى ارقىلى سولتۇستىك كورەيانى كەلىسسوز ۇستەلىنە ءبىر تابان بولسا دا جاقىنداتتى. الداعى ۋاقىتتا قۇراما شتات ءبىر شەگىنىس جاساماسا، وڭىنا باسىپ كەلە جاتقان سولتۇستىك كورەيا ماسەلەسى تاعى ۋشىعا تۇسەدى.

“The Qazaq Times”