فوتو: euronews.com

افريكاعا قايىرىمدىلىق ميسسيامەن ادەتتە جاستار، ستۋدەنتتەر ءوز-وزدەرىن سىناۋ ءۇشىن اينالىسادى. بىراق قىزىمەن بىرگە كۇنى كەشە كەنياعا 3 اپتالىق ميسسيامەن كەتكەن 93 جاستاعى يتاليالىق اجە تۋرالى اڭگىمە مۇلدەم بولەك. 

يتاليانىڭ سولتۇستىك-شىعىسىنداعى نوۆەنتا ۆيسەنتينادا تۋعان (Noventa Vicentina) يرما كەنياداعى ۋاقىتىن بالالار ۇيىندە تاربيەلەنىپ جاتقان بۇلدىرشىندەرگە كومەكتەسىپ وتكىزەدى.

اۋەجايدا جاسالعان يرمانىڭ مىنا ءبىر سۋرەتى فەيسبۋك الەۋمەتتىك جەلىسىندە قىزۋ تالقىلانىپ جاتىر. سۋرەتتى جاريالاعان يرمانىڭ نەمەرەسى ەليزا كولترو (Elisa Coltro): «مەنىڭ اجەم ءومىرىن وتباسىنا، ءوزىن قورشاعان ادامدارىنا ارناعان. قانداي قيىندىق بولماسىن ارقاشان شىن جۇرەكتەن كومەكتەسىپ جۇرەدى. ەندى بۇگىن ول كەنياعا جول تارتتى. تۋريستەرگە ارنالعان ايماققا ەمەس، اۋىلداعى بالالار ۇيىنە بارادى. ءومىر ءسۇرىپ جاتقان كەيىپ تانىتۋ مەن شىنىمەن ءومىر ءسۇرۋدىڭ ايىرماشىلىعى دا وسى شىعار. قاراڭىزدارشى، ونى ەشكىم دە توقتاتا المايدى. مەن ونى قاتتى جاقسى كورەمىن»، - دەپ جازدى.

ەليزا دا اجەسىنەن ۇلگى الىپ، سوڭعى 2 جىل بويى گرەكياداعى سۇريالىق بوسقىندارعا كومەكتەسىپ ءجۇر.

“The Qazaq Times”