اقش پرەزيدەنتى جانە ونىڭ كەڭەسشىسى. فوتو: The New York Times.

اقش اقپارات كوزدەرىنىڭ حابارىنا قاراعاندا، پرەزيدەنت ترامپتىڭ قىزى يۆانكا ترامپ پيوڭچاڭ (Pyeongchang) قىسقى وليمپيادا ويىندارىنىڭ جابىلۋ سالتاناتىنا سولتۇستىك كورەيانىڭ جوعارى وكىلىمەن كەزدەسەدى. بۇل اقش پەن سولتۇستىك كورەيا سىندى قاقتىعىستاعى ەلدىڭ اراسىندا وزگەشە ءىس-قيمىلعا جول اشۋى مۇمكىن. بۇل تۋرالى The Wall Street Journal باسىلىمى حابارلادى.

وڭتۇستىك كورەيانىڭ بىرىكتىرۋ مينيسترلىگىنىڭ بەيسەنبى كۇنگى حابارىنا قاراعاندا، سولتۇستىك كورەيانىڭ جەتەكشى پارتياسىنىڭ ورىنباسار توراعاسى كيم يوڭ چول (Kim Yong Chol) جەكسەنبى كۇنى وڭتۇستىك كورەياعا كەلىپ، سول ەلدەگى ءۇش كۇندىك رەسمي ساپارىن باستايدى. وڭتۇستىك كورەيا ۇكىمەتى وسى ورايدان پايدالانىپ، ەكى كورەيا قارىم-قاتىناسىن جاقسارتۋ جانە سولتۇستىك كورەيانىڭ يادرولىق باعدارلاماسى جونىندەگى كەلىسسوزگە جول اشۋعا تىرىساتىندارىن جەتكىزدى.

سولتۇستىك كورەيا پيوڭچاڭعا باراتىن جوعارى لاۋازىمدىسىنىڭ ەسىمىن جاريالاۋدان بىرنەشە ساعات بۇرىن ترامپ ۇكىمەتى دە اق ءۇي اتىنان وڭتۇستىك كورەياعا باراتىن رەسمي وكىلدەرىنىڭ ەسىمىن جاريا ەتتى. ولار اقش پرەزيدەنتى دونالد ترامپتىڭ قىزى جانە پرەزيدەنتتىڭ جوعارى كەڭەسشىسى يۆانكا ترامپ پەن اق ءۇيدىڭ رەسمي مالىمدەمەشىسى سارا ساندەرەس ەكەنى ءمالىم بولدى.

سولتۇستىك كورەيادان باراتىن رەسمي وكىل كيم يوڭ چول مەن ەلدىڭ ەڭ جوعارى باسشىسى كيم جوڭ ۋن اراسىندا ەشقانداي تۋىستىق قارىم-قاتىناس جوق. وعان قوسا، بىلايعى جۇرت ونى كحدر-نىڭ اسكەري بارلاۋ بولىمىندە ماڭىزدى لاۋازىمدى تۇلعا دەپ تانيدى. وڭتۇستىك كورەيا ۇكىمەتىنىڭ مالىمدەمەسىندە، كيم يوڭ چول ساپارىندا ەكى ەل اراسىنداعى كەلىسىمدى قولداۋشى تۇلعالاردىڭ ءبىرى ري سون گۋونمەن (Ri Son Gwon) كەزدەسەتىنىن ايتقان بولاتىن. ري سون گۋون بولسا وتكەن ايدا ەكى ەل اراسىنداعى العاشقى وتىرىستا رەسمي وكىل بولىپ بارعان.

“The Qazaq Times”