فوتو: https://static.independent

اقش پەن وڭتۇستىك كورەيا بىرلەسكەن اسكەري جاتتىعۋلاردى توقتاتادى.

اقش قورعانىس مينيسترلىگىنىڭ مالىمدەۋىنشە، اسكەري جاتتىعۋلار ەكى ەلدىڭ كەلىسىمىنە ساي توقتاتىلادى. بۇل قادام ارقىلى رەسمي ۋاشينگتون مەن سەۋل كورەي تۇبەگىندەگى قاقتىعىستاردىڭ الدىن الماق.

قۇراما شتات پەن وڭتۇستىك كورەيا بىرلەسكەن اسكەري جاتتىعۋلاردى جىلىنا ەكى رەت كورەي تۇبەگىندە وتكىزىپ كەلگەن. تۇبەكتە شيەلەنىستەردىڭ ارتۋىنا بايلانىستى، پحەنيان تاراپى بىرنەشە رەت نارازىلىق بىلدىرگەن بولاتىن. سەبەبى، كورەي تۇبەگىندە اسكەري جاتتىعۋ وتكىزەتىن ەلدەر اراسىندا كەلىسپەۋشىلىكتەر ءجيى ورىن العاندىقتان، قوس كورەيا سوعىس رەجيمىنە ءوتۋى مۇمكىن دەگەن كۇدىك ۇيالادى. بىراق، وڭتۇستىك كورەيا پرەزيدەنتى ءمۇن جا-ين جەرگىلىكتى ارنالارعا سۇحبات بەرىپ: «وڭتۇستىك كورەيانىڭ ءبىر نيەت، ءبىر تىلەكتە كۇش جۇمىلدىرۋ ۇستانىمى، كورەي تۇبەگى داعدارىسىنىڭ سوعىسقا ۇلاسپاۋىنىڭ نەگىزگى كەپىلى. ءبىز سوعىس تۋدىرماۋعا تىرىسامىز. ەگەر تاعى ءبىر مارتە سوعىس تۋاتىن بولسا بارلىعى كۇلگە اينالادى. كورەي تۇبەگىنىڭ اسكەري ءىس-قيمىلىنا تەك وڭتۇستىك كورەيا شەشىم قابىلداي الادى. ەگەر وڭتۇستىك كورەيا كەلىسپەسە، باسقا ەشبىر تاراپ كورەي تۇبەگىندە سوعىس باستامايدى»، – دەپ كەسىمدى جاۋاپ قايتارعان.

بۇگىنگى كۇنگە دەيىن ايماقتاعى ەلدەر عانا ەمەس، الەم ەلدەرى دە كورەي تۇبەگىندە تۋى مۇمكىن يادرولىق سوعىسقا الاڭداپ كەلگەن بولاتىن. دەگەنمەن، قازىرگى ءار تاراپتىڭ قادامدارى بۇل قاۋىپتىڭ اۋىلىن ءبىرشاما الىستاتتى. وڭتۇستىك كورەيا باسشىسى كورەيلەردىڭ تاعدىرىنا قاۋىپ تۋدىراتىن قادامعا بارمايتىنىن اتاپ ءوتتى.

"The Qazaq Times"