![](https://qazaqtimes.com/kk/content/uploads/2018/02/773x435_no-bloody-nose-plan-for-north-korea-us-official-senators-800x480.jpg?token=95690300f89297fda438287bb74309a0)
اقش-تىڭ ازياداعى باس ديپلوماتى سيۋزان تورنتون (Susan Thornton) بەيسەنبى كۇنى ترامپ اكىمشىلىگىنىڭ سولتۇستىك كورەياعا شابۋىلداۋعا بايلانىستى ەشقانداي ستراتەگياسى بولماعانىن مالىمدەدى، - دەپ حابارلايدى Euronews اقپارات اگەنتتىگى.
دونالد ترامپ اكىمشىلىگى سولتۇستىك كورەيانىڭ قۇراما شتاتتارعا ۇشىرۋى مۇمكىن يادرولىق قارۋلارىنا قاتىستى ماسەلەنى ديپلوماتيالىق جولمەن شەشۋدى قالايتىنىن بىلدىرەگەنىمەن، امەريكانىڭ رەسمي وكىلدەرى ترامپ پەن ونىڭ كەڭەسشىلەرى ازيانىڭ وقشاۋلانعان ەلىنە شابۋىل جاساۋ ۇسىنىسىن تالقىلاعانىن مالىمدەگەن كورىنەدى.
جوعارىدا تالقىلانعان دۇنيە شىنىمەن جۇزەگە اساتىن بولسا قانداي قايعىلى، ورىن تولمايتىن سالدارى بولاتىنىن بۇرىننان بولجاپ كەلە جاتقان ماماندار قىسقى وليمپيادا كەزىندە سولتۇستىك كورەيا وڭتۇستىك كورەيامەن بىرگە شىققاننان كەيىن باسىلعان سىڭايلى.
تورنتوندى شىعىس ازياداعى حاتشى كومەكشىسى قىزمەتىنە تاعايىنداۋ كەزىندە اقش-تىڭ ەكى سەناتورى (دەموكرات پەن رەسپۋبليكاشىل) باسقا دا سەناتورلارمەن بىرگە اق ءۇيدىڭ وكىلەتتى تۇلعالارىنا "سولتۇستىك كورەياعا قاتىستى ونداي ستراتەگيا جوق" دەپ ايتقان بولاتىن.
اقش-تىڭ شابۋىل جاساۋ ستراتەگياسى جوق ەكەندىگىنە بايلانىستى سەناتور-دەموكرات جاننا ءشاحيننىڭ (Jeanne Shaheen) "بۇل ءسىزدىڭ پايىمداۋىڭىز عوي؟" دەگەن سۇراعىنا تورنتون ء"يا" دەپ جاۋاپ بەردى.
ەكىنشى سەناتور، رەسپۋبليكاشىل دجەيمس ريچ (James Risch) "زاڭ شىعارۋشىلارعا اكىمشىلىك ادامدارى تاراپىنان شابۋىل قاراستىراتىن ەشقانداي ارنايى ستراتەگيانىڭ جوق ەكەندىگى ايتىلدى" دەگەن بولاتىن. سونىمەن قاتار ءسوزىنىڭ سوڭىندا: "بۇل تاقىرىپ مۇلدەم قوزعالماعان دا، تالقىلانباعان دا. سولتۇستىك كورەياعا قاتىستى جوعارىدا ايتىلعانداي ەشقانداي شابۋىل جوسپارلانباعان. ۋايىمدايتىن ەشنارسە جوق", - دەدى.
تورنتوننىڭ ايتۋىنشا، اقش سولتۇستىك كورەيامەن كەلىسسوزگە كەلۋگە كەز كەلگەن ۋاقىتتا دايىن ەكەنىن ءبىلدىردى، بىراق سول ءسات تۋعاندا ەڭ ءبىرىنشى قوزعالۋى كەرەك ماسەلە - سولتۇستىك كورەيانىڭ يادرولىق قارۋ-جاراعىن جويۋ.