فوتو: CNN

36 جاستاعى ۆيدەوبلوگەر بەن بەننايت (Ben Bennight) قىركۇيەكتە يۋتۋبتا جاريالاعان ۆيدەوعا بىرەۋدىڭ قورقىنىشتى كوممەنت قالدىرعانىن بايقاپ، بىردەن فەدەرالدى بارلاۋ بيۋروسىنا (فبب) حابارلاسقانىن ايتتى،- دەپ حابارلايدى CNN اقپارات اگەنتتىگى.

"مەن كاسىبي مەكتەپ مەرگەنى بولامىن" دەگەن كوممەنتتى نيكولاس كرۋز ەسىمدى جىگىت قالدىرىپتى. سارسەنبى كۇنى فلوريداداعى Marjory Stoneman Douglas جوعارى مەكتەبىندە 17 ادامدى اتىپ ولتىرگەن كۇدىكتىنىڭ دە ەسىمى نيكولاس كرۋز (Nicolas Cruz).

بەننايت سNN-مەن بولىسكەن كوممەنتتىڭ سكرينشوتىن جاساپ، فبب-نىڭ پوشتاسىنا جىبەردىم دەپ ويلاعان. بىراق ول پوشتا قاتە بولىپ شىققان. سودان كەيىن بەن فبب-عا حابارلاسىپ،  يۋتۋبتاعى كوممەنتتى الىپ تاستاۋعا ءماجبۇر بولعان.

بەننايتتىڭ ايتۋىنشا، فبب-نىڭ ميسسيسيپيدەگى بولىمشەسىنىڭ قىزمەتكەرلەرى ونىڭ كەڭسەسىنە كەلىپ، ءبىراز اڭگىمەلەسكەن. بىراق بەن بۇل اككاۋنت يەسى كىم ەكەنىن، ول تۋرالى ەشنارسە بىلمەيتىنىن ايتقان. وسى سارسەنبىدە بولعان وقيعاعا دەيىن بەن بيۋرو قىزمەتكەرلەرىن سودان كەيىن كورمەگەن.

فبب-نىڭ ماياميدەگى بولىمشەسىنە جاۋاپتى ارنايى اگەنت روبەرت لاسكي (Robert Lasky) ءباسپاسوز كونفەرەنتسياسىندا بولىمشەگە وتكەن جىلى يۋتۋبتاعى كوممەنتكە بايلانىستى ءبىر شاعىم تۇسكەنىن راستادى. "كوممەنتتى جاريالاعان اككاۋنتتىڭ شىنايى يەسى، ونى قايدان جانە قاشان جاريالاعانى تۋرالى ەشقانداي اقپارات كەلىپ تۇسپەدى. تەكسەرىس بارىسىندا دا فبب ول اككاۋنت يەسىن انىقتاي المادى", - دەدى.

سارسەنبىدەگى قايعىلى وقيعادان كەيىن فبب قىزمەتكەرى بەننايتقا حابارلاسىپ، قىركۇيەكتەگى كوممەنتكە بايلانىستى جاعدايدىڭ ءمان-جايىن قايتا سۇراستىرادى.

بەن "الەۋمەتتىك جەلىدە جاڭالىقتار قاراپ وتىرعانىمدا مەكتەپتەگى جايتتى كوزىم شالىپ قالدى، بىراق وعان ايتارلىقتاي ءمان بەرمەپپىن. كەيىننەن فبب حابارلاسىپ، كۇدىكتىنىڭ ەسىمى كەزىندە مەنىڭ ۆيدەومنىڭ استىنا كوممەنتتى قالدىرعان اككاۋنت اتىمەن بىردەي ەكەنىن ايتتى. قازىرگى ونلاين-الەمدە كىمنىڭ ناقتى نە ىستەپ جۇرگەنىن قوسىمشا اقپاراتسىز انىقتاۋ قيىن ەكەنىن بىلەمىن، بىراق اتالعان كوممەنتكە دۇرىستاپ نازار اۋدارىپ، جاڭاعى اككاۋنتتىڭ يەسىن تابۋعا تىرىسىپ، ونى ءبىرشاما ۋاقىت باقىلاۋعا العاندا مۇنداي جاعداي ورىن الماس پا ەدى" ، - دەيدى.

“The Qazaq Times”