تۇركيا پرەزيدەنتى رەجەپ تايىپ ەردوعان (Recep Tayyip Erdogan) اقش-تىڭ مەملەكەتتىك حاتشىسى رەكس تيللەرسون (Rex Tillerson) الدىندا "اقش-تىڭ سۇريالىق كۇردتەردى قارۋمەن قامتاماسىز ەتۋىن جالعاستىرۋى تۇركيانىڭ بولاشاقتاعى ءىس-ارەكەتتەرىنە اسەر ەتەتىنى ءسوزسىز" دەگەن مالىمدەمە جاسادى، - دەپ حابارلايدى Euronews اقپارات اگەنتتىگى.

اقش-تىڭ وكىلەتتى ورگاندارىنىڭ مالىمەتىنشە، تيللەرسون ناتو وداقتاستارىنىڭ ءسۇريا جاعدايىنا بايلانىستى كوزقاراستارى ءار ءتۇرلى ەكەنىن ەسكەرىپ، الداعى بەيسەنبى-جۇما كۇنگى تۇركياعا ساپارىندا كەلىسسوزدەر وڭاي بولمايدى دەپ بولجاپ وتىر.

تۇركيا اقش-تىڭ سۇريالىق كۇردتەر وداعىن قولداعانى ءۇشىن قاتتى ىزالى بولدى. سەبەبى انكارا ونى تەرروريستىك ۇيىم جانە تۇركيا جەرىندە 30 جىلعا ۋاقىت كوتەرىلىس ۇيىمداستىرىپ كەلە جاتقان، جۇمىس ىستەۋىنە تىيىم سالىنعان كۇردىستاننىڭ جۇمىس پارتياسىنىڭ ۇلعايۋى دەپ قاراستىرادى.

وتكەن ايدا تۇركيا وڭتۇستىگىندەگى شەكارادان كۇردتەردى الىستاتۋ ءۇشىن ءسۇريانىڭ افرين ايماعىندا ء"زايتۇن بۇتاعى" وپەراتسياسىن باستادى.

سونىمەن قاتار كۇردتەر باقىلاۋىنداعى ءسۇريانىڭ تاعى ءبىر قالاسى مانبيدجگە (Manbij) دە اسكەرىن كىرگىزگەن جاعدايدا، سوندا ورنالاسقان اقش ساربازدارىنا ولارعا كەدەرگى بولماسىن دەپ ەسكەرتتى. بۇل اقش-تىڭ گەنەرال-لەيتەنانتى پول فانك (Paul Funk) مانبيدجگە بارعان ساپارى كەزىندە ايتىلعان ءسوز بولاتىن.

دەگەنمەن ۋاشينگتون ءوز ساربازدارىن مانبيدجدەن قايتاراتىن ويى جوق ەكەنىن ايتىپ، سونى دالەلدەۋ ءۇشىن وتكەن اپتادا مانبيدجگە ەكى كومانديرىن جىبەردى.

اقش-تىڭ قورعانىس دەپارتامەنتىنىڭ 2019-جىلعى بيۋدجەت كوشىرمەسىنە سەنسەك، پەنتاگون 300 ملن اقش دوللارىن ءسۇريانىڭ "پويىز جانە باسقا دا تەحنيكاسىنا", 250 ملن اقش دوللارىن شەكارا قاۋىپسىزدىگىن قامتاماسىز ەتۋ شارالارىنا بەكىتكەن ەكەن.

اتالعان قاراجاتتىڭ قانداي بولىگى كۇردتەر اسكەرىن قارجىلاندىرۋعا باعىتتالعانى جازىلماعاندىقتان، تۇرىك باق بۇل اقپاراتتى "پەنتاگون 2019 جىلى كۇردتەر وداعىنا 550 ملن اقش دوللارىن بولگەن" دەپ جاريالادى.

ەردوعان: "ولاردىڭ تەرروريستەردى وسىلاي قولداپ وتىرعانى دۇرىس ەمەس. اقش حالقىنا مەملەكەت سىزدەردىڭ سالىقتارىڭىزدان قۇرالعان بيۋدجەتتەن تەرروريستەردى قولداۋعا اقشا ءبولىپ وتىر دەگىم كەلەدى.

“The Qazaq Times”