باكۋدە كاسپي تەڭىزىنىڭ جاڭا قۇقىقتىق مارتەبەسىن رەتتەيتىن جۇمىس توبىنىڭ 48-ءشى وتىرىسى اياقتالدى

يران تەلەراديو بىرلەستىگىنىڭ اقپارات اگەنتتىگىنىڭ باكۋدەن حابارلاۋىنشا، يران، رەسەي، قازاقستان، تۇركىمەنستان جانە ءازىربايجان سىرتقى ىستەر مينيسترلەرى ورىنباسارلارىنىڭ وتىرىسىندا كاسپي تەڭىزىنىڭ جاڭا قۇقىقتىق مارتەبەسىنە قاتىستى كونۆەنتسيا دايىنداۋ تۋرالى سۇحباتتاسۋ ءوتىپ، كونۆەنتسيانى دايىنداۋ جۇمىستارى بىرنەشە قادام العا ىلگەرىلەدى، دەپ حابارلايدى “فارس” ءباسپاسوز اگەنتتىگى.

يران سىرتقى ىستەر ءمينيسترىنىڭ ازيا جانە تىنىق مۇحيت ەلدەرى ىستەرى جونىندەگى ورىنباسارى ءارى يراننىڭ بەس ادامنان تۇراتىن دەلەگاتسياسىنىڭ جەتەكشىسى يبراحيم راحيمپۋر وتىرىستىڭ سوڭىندا كەلىسسوزدەرگە ريزاشىلىق ءبىلدىرىپ: «وتىرىسقا قاتىسقان كاسپي تەڭىزى جاعالاۋىندا ورنالاسقان بەس ەلدىڭ دەلەگاتسياسى كەلىسسوزدەر مەن  ونىڭ ناتيجەلەرىنە ريزا بولدى»،- دەدى.

يران سىرتقى ىستەر ءمينيسترىنىڭ ورىنباسارى كاسپي تەڭىزىنىڭ جاڭا قۇقىقتىق مارتەبەسىنە قاتىستى كونۆەنتسيانى دايىنداۋ جۇمىس توبىنىڭ 48-ءشى وتىرىسىنىڭ كەلىسىمدەرىن ماڭىزدى دەپ باعالاپ: «ەگەمەندىك، قۇزىرەتتiلىك، قاۋىپسىزدىك، اۋماقتىق سۋلار، بالىق اۋلاۋ ايماعى، تەڭىز ءتۇبى مەن جەر قويناۋىنىڭ شەكارالارى، اسكەري كەمەلەردىڭ اۋماقتىق سۋلاردان ءوتۋى جانە  كابەلدەر مەن قۇبىرلار جۇرگىزۋ وتىرىستىڭ نەگىزگى تاقىرىپتارى رەتىندە تالقىلاندى»،- دەدى.

كاسپي تەڭىزىنىڭ جاڭا قۇقىقتىق مارتەبەسىنە قاتىستى كونۆەنتسيانى دايىندايتىن جۇمىس توبىنىڭ كەلەسى وتىرىسى اشحابادتا وتەدى.

“The Qazaq Times”