Каспий теңізінің жаңа құқықтық мәртебесін реттеу жұмыс тобының 48-ші екі күндік отырысы бейсенбі күні мәлімдеме жариялап, өз жұмысын аяқтады. Фото: parstoday.com

Иран Телерадио бірлестігінің ақпарат агенттігінің Бакуден хабарлауынша, Иран, Ресей, Қазақстан, Түркіменстан және Әзірбайжан Сыртқы істер министрлері орынбасарларының отырысында Каспий теңізінің жаңа құқықтық мәртебесіне қатысты конвенция дайындау туралы сұхбаттасу өтіп, конвенцияны дайындау жұмыстары бірнеше қадам алға ілгеріледі, деп хабарлайды “Фарс” баспасөз агенттігі.

Иран Сыртқы істер министрінің Азия және Тынық мұхит елдері істері жөніндегі орынбасары әрі Иранның бес адамнан тұратын делегациясының жетекшісі Ибрахим Рахимпур отырыстың соңында келіссөздерге ризашылық білдіріп: «Отырысқа қатысқан Каспий теңізі жағалауында орналасқан бес елдің делегациясы келіссөздер мен  оның нәтижелеріне риза болды»,- деді.

Иран Сыртқы істер министрінің орынбасары Каспий теңізінің жаңа құқықтық мәртебесіне қатысты конвенцияны дайындау жұмыс тобының 48-ші отырысының келісімдерін маңызды деп бағалап: «Егемендік, құзыреттiлік, қауіпсіздік, аумақтық сулар, балық аулау аймағы, теңіз түбі мен жер қойнауының шекаралары, әскери кемелердің аумақтық сулардан өтуі және  кабелдер мен құбырлар жүргізу отырыстың негізгі тақырыптары ретінде талқыланды»,- деді.

Каспий теңізінің жаңа құқықтық мәртебесіне қатысты конвенцияны дайындайтын жұмыс тобының келесі отырысы Ашхабадта өтеді.

“The Qazaq Times”