ەۋروپا پارلامەنتى. فوتو: 112.internationa.

تۇركيانىڭ قارۋلى كۇشتەرى «ءزايتۇن بۇتاعى» دەپ اتاعان اسكەري وپەراتسياسى ارقىلى افرين ايماعىنداعى قارۋلى كۇشتەردى ىعىستىرا باستاعان تۇستا، ەۋروپا پارلامەنتىندە تۇركيانىڭ بۇل ارەكەتىنە نارازىلىقتار كۇشەيە ءتۇستى. ەۋروپا پارلامەنتىندەگى جۇزدەگەن دەپۋتات اسكەري ارەكەتتەردى توقتاتۋ تۋرالى شەرۋ وتكىزدى. بۇل تۋرالى «انادولى» اقپاراتتىق اگەنتتىگى حابارلادى.

جۇزگە جۋىق دەپۋتات قولدارىنا «افرين جالعىز ەمەس» دەپ جازىلعان جالاۋشالارىن، كەرمە تۋلارىن كوتەرىپ، تۇركيانىڭ اسكەري ارەكەتتەرىنە نارازىلىق ءبىلدىردى. تۇركيا جاق بۇل ارەكەتتى تەررورلىق ۇيىمدى قولداۋ دەپ باعالادى.

باستى قايشىلىق انكارا بيلىگى مەن ەۋروپارلامەنتتىڭ YPG (حالىقتىڭ ءوزىن قورعاۋ قوسىنى) قارۋلى كۇشتەرىنە دەگەن ۇقساماعان كوزقاراستان شىعىپ وتىر. اقش جانە ەو ەلدەرى كۇرد جاساقتارىن تەررورلىق ۇيىمداردان جانە باشار اساد رەجيمىنەن قورعانۋ كۇشتەرى دەپ تانيدى. بىراق، انكارا بيلىگى بۇل قارۋلى كۇشتەردى تۇركيا ىشىندەگى كۇردتەرمەن استاسقان تەررورلىق ۇيىم دەپ قارايدى.

“The Qazaq Times”