اريزونادا ماڭگى جاساۋدىڭ قۇپياسى تابىلدى

اريزوناداعى Alcor اتتى ارنايى زەرتتەۋ ورتالىعىندا ادامدى مۇزعا قاتىرىپ، دامىعان تەحنولوگيا ارقىلى قايتا تىرىلتۋگە بولاتىن بولدى. قازىر Alcor كومپانياسىنىڭ ارنايى زەرتتەۋ ورتالىعىندا 154 ادامنىڭ مۇزعا قاتىرىلعان دەنەسى ساقتالۋدا. ادامنىڭ دەنەسى -200 س° تەمپەراتۋراداعى ازوت سۇيىقتىعىندا شىلانعان. بۇل تۋرالى BBC ونلاين قىزمەتى حابارلايدى.

زەرتتەۋشىلەردىڭ ايتۋىنشا، قازىر بۇل تەحنولوگيانى پايدالانۋ قۇنى 200 مىڭ اقش دوللارى. قاراجاتىن ۇنەمدەگىسى كەلگەندەر نەمەسە اقشاسى جەتپەگەندەر باسىن عانا مۇزداتىپ قويسا بولادى. ءتىپتى ءۇي جانۋارلارىن دا ارنايى تەحنولوگيامەن توڭازىتىپ قويىپ، كەيىن ءتىرىلتىپ الۋعا بولادى.

دەگەنمەن، كەيبىر عالىمدار تەحنولوگيانىڭ قاۋىپسىزدىگىنە كۇمان كەلتىرەدى. ايتالىق پروفەسسور كلايۆ كوەن: «ميدى مۇزداتىپ جاتقان ءاربىر ميكروەلەمەنتكە قاجەتتى زاتتاردىڭ قۇيىلىپ تۇراتىنى تۋرالى ناقتى مالىمەت جوق. دەمەك، ميدىڭ -196س°-قا تۇسپەي قالۋى، سونىڭ سالدارىنان اقاۋسىز ساقتالماي قالۋى مۇمكىن»، – دەگەن پىكىردە.

Alcor كومپانياسى ءبىر رەت توڭازىتىلعان ادامدى قايتا ءتىرىلتۋ وڭاي بولمايدى دەيدى. دەگەنمەن، زەرتتەۋشىلەر بۇل تەحنولوگيانىڭ بولاشاعىنان زور ءۇمىت كۇتىپ وتىر. ماڭگىلىك جاساۋدى كىم قالاماسىن؟!

“The Qazaq Times”