تۇرعىن ءۇي قۇرىلىس جيناق بانكى كليەنتتەرى مەملەكەتتىك سىياقى الدى

تۇرعىن ءۇي قۇرىلىس جيناق بانكىنىڭ («بايتەرەك» حولدينگىنىڭ ەنشىلەس ۇيىمى) 895 360 سالىمشىسى جالپى سوماسى 23 ملرد تەڭگەنى قۇرايتىن مەملەكەتتىك سىياقىعا قول جەتكىزدى، دەپ حابارلايدى بانكتىڭ ءباسپاسوز قىزمەتى. 

90 760 تەڭگە كولەمىندەگى ەڭ جوعارعى مەملەكەتتىك سىيلىقاقىنى بانكتىڭ 160 780 كليەنتى الدى. بۇل سالىمشىلار 2017 جىلى شوتتارىنا كەم دەگەندە 453 800 تەڭگە، ياعني 200 ايلىق ەسەپتىك كورسەتكىشكە تەڭ قاراجات جيناعان. دەپوزيتىنە ۇلكەن سوما اۋدارعان كليەنتتەر مەملەكەتتىك سىيلىقاقى ەسەپتەلمەگەن بيىلعى قاراجات بويىنشا 20 پايىزدىق اتالعان بونۋستى 2018 جىلدىڭ ناتيجەسىندە الا الادى.

وسى جىلدىڭ قورىتىندىسى بويىنشا ەڭ جوعارعى مەملەكەتتىك سىيلىقاقىنى الۋ ءۇشىن بانك سالىمشىلارىنا اي سايىن شوتتارىنا 40 000 تەڭگەدەن اۋدارىپ وتىرۋ جەتكىلىكتى بولماق.

ال ەگەر تۇرعىن ءۇي قۇرىلىس جيناق بانكى كليەنتى جىل سايىن بۇدان دا كوپ اقشا جينايمىن، دەپوزيت تابىستىلىعىن ارتتىرامىن دەسە، وتباسى مۇشەلەرىنىڭ اتىنا بىرنەشە سالىم اشىپ، بارىنە بىردەي سوما سالىپ تۇرۋى كەرەك. بۇل جاعدايدا مەملەكەتتىك سىيلىقاقى ءار شوتقا اۋدارىلادى. تۇرعىن ءۇي زايمىن الۋعا قاجەت قاراجات جينالعاندا، دەپوزيتتەردى بىرىكتىرىپ جىبەرىپ، باسپانا ساتىپ الۋعا بولادى. تۇرعىن ءۇي قۇرىلىس جيناق بانكىنىڭ مۇنداي مۇمكىندىگى «وتباسىلىق پاكەت» دەپ اتالادى.

- بىرنەشە بانكتىڭ يپوتەكا بەرۋ بويىنشا تالاپ-شارتتارىن سارالاپ بارىپ، 2014 جىلى تۇرعىن ءۇي قۇرىلىس جيناق بانكىنەن شوت اشتىق. ارتىق تولەمەي پاتەر ساتىپ الۋ ءۇشىن قاراجات جيناۋ كەرەك ەكەن. وتباسى بولىپ تۇرعىن ءۇي قۇرىلىس جيناق بانكىنە اقشا سالىپ، ەندى باۋىرىمىزعا پاتەر الىپ بەرەيىك دەپ وتىرمىز. ول وسى جىلى ۇيلەنگەن بولاتىن. جاڭا باسپانا جاس جانۇياعا ۇلكەن قولداۋ بولادى، - دەيدى وتباسى مۇشەلەرىنىڭ ءبىرى، بانك سالىمشىسى روزا ابىلقىزى.

ەكىنشى دەڭگەيلى بانكتەردىڭ تالاپتارى بويىنشا 5 000 دەپوزيتكە تىيىم سالىنعاندىقتان، بۇل شوتتاردىڭ يەلەرى مەملەكەتتىك سىيلىقاقى الا المادى، سەبەبى اتالعان سالىمشىلار باسقا بانكتەر الدىنداعى قارىزدارىن دەر كەزىندە قايتارا الماعان. تۇرعىن ءۇي قۇرىلىس جيناق بانكىنىڭ مالىمەتىنشە، بانك سالىمشىسى تۇتىنۋشىلىق نەسيە بويىنشا تولەمدى كەشىكتىرگەن كۇننىڭ وزىندە ەكىنشى دەڭگەيلى بانكتەرگە تولەم تالاپتارىن تۇرعىن ءۇي قۇرىلىس جيناقتارىنا قاتىستى قولدانۋعا تىيىم سالۋدى ۇسىنىپ وتىر.

تۇرعىن ءۇي قۇرىلىس جيناق بانكىنىڭ مالىمەتىنشە، 2018 جىلدىڭ قورىتىندىسى بويىنشا مەملەكەتتىك سىيلىقاقى 2019 جىلدىڭ العاشقى كۇندەرى تۇسەدى دەپ جوسپارلانىپ وتىر. قازىر وسى باعىتتا بيزنەس-پروتسەستەر جەتىلدىرىلىپ، نورماتيۆتىك قۇجاتتار بويىنشا جۇمىستار جۇرگىزىلۋدە.

“The Qazaq Times”