قازاقستان ەكونوميكالىق ەركىندىك رەيتينگىندە رەسەيدەن وزدى

قازاقستان ەكونوميكالىق ەركىندىك رەيتينگىندە 41 ورىندا تۇر جانە ورتالىق ازيا ەلدەرى مەن رەسەيدەن وزىق. 

Index of Economic Freedom اقپاراتى بويىنشا، قازاقستاننىڭ ەكونوميكالىق ەركىندىك ەسەبى  69,1%-عا (+0,1%) باعالانىپ وتىر.

"مەملەكەت مۇناي جانە ءوندىرىس سالاسىندا وزىنە سەنىمدى. سوندىقتان ەل ۇكىمەتى كولىك، فارماتسەۆتيكا، تەلەكوممۋنيكاتسيا، مۇناي-حيميا جانە تاماق ونەركاسىبى سىندى سالالاردى اشۋعا تىرىسۋدا. دەگەنمەن كەيبىر قالىپتى وزگەرىستەرگە قاراماستان، ينۆەستورلار سىبايلاس جەمقورلىق، بيۋروكراتيادان، ايماقتىق جانە مۋنيتسيپالدىق دەڭگەيدەگى زاڭ ۇستەمدىگىنەن الاڭداۋدا. بۇدان بولەك وتىمدىلىك دەڭگەيىنىڭ تومەن بولۋىنان زارداپ شەگىپ وتىرعان بانك سەكتورى، ونداعى اكتيۆ ساپاسىنىڭ تومەن بولۋى، اشىقتىقتىڭ بولماۋى قوسىمشا ماسەلە تۋعىزۋدا", - دەيدى  Heritage Foundation ساراپشىلارى.

ورتالىق ازيا ەلدەرى اراسىندا اتالعان رەيتينگتە قىرعىزستان 78 ورىنعا ورنالاسقان. تاجىكستان - 106, وزبەكستان - 152, تۇركىمەنستان - 169 ورىندا تۇر. ال رەسەي 107 ورىندا.

ەكونوميكالىق رەيتينگ كورسەتكىشى جوعارى ەل  - گونكونگ (ورتاشا بالى 90,2%). بۇدان بولەك ەكونوميكاسى بارىنشا ەركىن ەل رەتىندە سينگاپۋر (88,8%), جاڭا زەلانديا (84,2%), شۆەيتساريا (81,7%) تانىلدى.

ال رەيتينگتە ەڭ سوڭعى تۇرعان ەلدەر: كونگو (38,9%), كۋبا (31,9%), ۆەنەسۋەلا (25,2%) جانە سولتۇستىك كورەيا (5,8%).

“The Qazaq Times”