قىسقى وليمپيادا ويىنىندا وڭتۇستىك كورەيادا قولدانىلاتىن جاڭا تەحنولوگيا تۇرلەرى

وڭتۇستىك كورەيا الەمگە وزدەرىندەگى ينتەرنەت جىلدامدىعىنىڭ جوعارى بولۋىمەن تانىمال (ورتاشا جىلدامدىق 28,6 مبيت/سەك). ال وليمپيادا ويىندارى وتەتەتىن عيماراتتاردا ينتەرنەتكە قوسىلۋ مۇلدەم جىلدام بولماق. ياعني وندا Intel كومپانياسى ۇسىنعان ءموبيلدى 5G ينتەرنەتى جۇمىس ىستەيدى. بۇل ارقىلى قاجەتتى فايلداردى 100 مبيت/سەك جىلدامدىقپەن جۇكتەپ الۋعا بولادى.

Intel كومپانياسىنىڭ مالىمەتىنشە  5G ينتەرنەت ساپالى تىكەلەي ترانسلياتسيا  جاساۋعا جانە ويىنعا كەلۋشىلەرگە VR تاجىريبەنى (VR - ۆيرتۋالدى شىندىق، الەمدەگى تىلسىم دۇنيەلەردى تەحنولوگيا ارقىلى سەزىنۋ) كورۋگە مۇمكىندىك بەرەدى.

فوتو: Yonhap

كونكيمەن جۇگىرەتىندەرگە ارنالعان "اقىلدى" كوستيۋم

نيدەرلاندى اتىنان قاتىساتىن ەكى كونكيشى Samsung-ءتىڭ "اقىلدى" كوستيۋمدەرىن كيمەك. ارنايى داتچيكپەن جابدىقتالعان بۇل كوستيۋمدەر جاتتىقتىرۋشىلارعا كونككيشىلەر تۋرالى اقپاراتتى حابارلاپ وتىرادى. ءموبيلدى قوسىمشانىڭ كومەگىمەن، جاتتىقتىرۋشىلار الىنعان اقپاراتتى تالداپ، سپورتشىلار كوستيۋمدەگى بىلەزىكتىڭ كومەگىمەن جاتتىقتىرۋشىنىڭ وزىنە بەرگەن سيگنالىن قابىلداي الادى. مىسالى جاتتىقتىرۋشى "جىلدامدىقتى كوبەيتۋ ءۇشىن ءسال ءيىلۋ كەرەك" دەگەن سيگنال بەرە الادى. بىراق بۇل تەك جاتتىعۋ كەزىندە قولدانىلادى. ال جارىس كەزىندە قولدانىلسا تسيفرلى دوپينگ رەتىندە ەسەپكە الىنىپ كەتۋى مۇمكىن.

فوتو: Samsung

تاۋ شاڭعىشىلارىنا ارنالعان شلەمدەر 

ەندى تاۋ شاڭعىشىلارى ويىن كەزىندە جىلدامدىقتى 144 كم/ساع-قا دەيىن جەتكىزە الادى. ويتكەنى ولاردىڭ قاۋىپسىزدىگى ءۇشىن ارنايى شلەمدار جاسالعان. ەڭ سوڭعى شىققان شلەم  Giro Avance دەپ اتالادى جانە ونى اقش-تان كەلگەن كوماندا كيەتىن بولادى. Giro Avance شلەمدەرى باسقا قاتتى سوققى تيگەن جاعدايدا اينالىپ كەتپەيتىندەي ەتىپ جاسالعان.

جىلدامدىعى جوعارى ەكسپرەسس

وتكەن جىلدىڭ قاراشا ايىندا وڭتۇستىك كورەيا ۇكىمەتى سەۋل مەن پيوڭچاڭ اراسىندا قاتىنايتىن كورەي تەمىر جول ەكسپرەسىنىڭ قۇرىلىسى اياقتالعانىن حابارلاعان ەدى. قۇرىلىس جۇمىستارىمەن Hyundai كومپانياسى اينالىسقان. ەكسپرەسس پويىزدىڭ ءجۇرۋ جىلدامدىعى - 300 كم/ساع. ءجۇرۋ ۋاقىتى - 69 مينۋت. شەتەلدىك قوناقتار ءۇشىن جەڭىلدىكتەر قاراستىرىلعان. ياعني 192 دوللارعا ارنايى قوسىمشانى ساتىپ الىپ، سول ارقىلى ءبىر اپتا ەكسپرەستە جۇرۋگە جانە سونداعى باسقا قىزمەت تۇرلەرىن پايدالانۋعا بولادى.

فوتو: olympic.org

تاۋ شاڭعىشىلارىنا ارنالعان قاۋىپسىزدىك جاستىقشاسى

كوپتەگەن شاڭعىشىنىڭ "اقىلدى" كوستيۋمدەرىندە قاۋىپسىزدىك جاستىقشالارى بولادى. اتالعان كوستيۋمدەردە جەتى بىردەي داتچيك ورنالاسادى. سول ارقىلى سپورتشىنىڭ جاعدايى باقىلانادى. ەگەر سپورتشىلار قۇلاۋ سىندى قاندايدا ءبىر  كەدەرگىلەرگە تاپ بولسا، جاستىقشا بىردەن اشىلادى. العاشىندا بۇل جاستىقشالار MotoGP موتوجارىسى بويىنشا الەم چەمپيوناتىنا قاتىساتىندارعا ارنالىپ جاسالعان.

سەنسورلارى بار مۇنداي "اقىلدى كوستيۋمدى" 2014 جىلعى وليمپيادا ويىندارىندا اۋستريالىق ماتتياس مايەر كيگەن جانە سونداعى قاۋىپسىزدىك جاستىعىنىڭ ارقاسىندا 2015 جىلعى قاۋىپتەن امان قالعان.

“The Qazaq Times”