تۇرىك اقپارات كوزدەرى: انكارانىڭ اسكەري قادامىن قولداۋشىلار كوبەيدى

تۇركيانىڭ ءسۇريا جەرىنە قارۋلى كۇشتەرىن كىرگىزۋىنە ءارتۇرلى پىكىرلەرگە، قارسىلىقتارعا ۇشىراپ جاتقانىمەن، سول ەلدەگى اقپارات كوزدەرى وزدەرى «ءزايتۇن اعاشى وپەراتسياسى» دەپ اتاعان وسى ءبىر اسكەري قادامدى قولداعان ەلدەر تۋرالى ءسوز ەتۋدە. بۇل تۋرالى تۇركيانىڭ «انادولى» اقپارات اگەنتتىگىنىڭ رەسمي سايتى جازدى.

اتالعان اگەنتتىكتىڭ حابارىنا قاراعاندا، الەم مۇسىلماندار بىرلەستىگى تۇرىك ارمياسىنىڭ ارەكەتىنە قولداۋ ءبىلدىرىپ، «يسلام الەمىنىڭ بىردەن ءبىر ءۇمىتى بولعان تۇركياعا سىرتقى كۇشتەردىڭ جاساعان قاستاندىق ويىنىن بۇزۋ وپەراتسياسىن قولدايمىز» دەگەنىن ايتادى. بۇعان قوسا، تۇرىك اقپارات كوزدەرى گوللانديا سىرتقى ىستەر مينيسترلىگىنىڭ انكارا تەررورلىق ۇيىم دەپ تاپقان YPG-ءدى ايىپتاپ، «جازىقسىز دەۋدەن اۋلاقپىز» دەگەن باعاسىن العا تارتادى.

كەشە كەشكى حابارلارىندا، تۇركيا پرەزيدەنتى رەجەپ تايىپ ەردروعان اقش پرەزيدەنتى دونالد ترامپپەن تەلەفون ارقىلى سويلەسكەنىن، سويلەسۋ بارىسىندا ءسۇريانىڭ سولتۇستىگىندەگى كۇرد قارۋلى كۇشتەرىنە اسكەري قارۋ-جاراقپەن قولداۋ كورسەتۋىن توقتاتۋ تۋرالى تالاپ قويعانىن حابارلادى. دەگەنمەن، بۇل تۋرالى اقش تارابىنىڭ رەسمي مالىمدەمەسىن كەزدەستىرە المادىق.

پەنتاگوننىڭ وكىلى حەاتەر ناۋەرت بولسا ناتو-نىڭ ەكى بىردەي وداقتاسىن ۇيىمنان الىستاتقانى ءۇشىن رەسەيدى ايىپتاعان. ول جانە سوزىندە انكارا بيلىگىنىڭ ەلگە جاقىن تەررورلىق كۇشتەردەن جانە YPG قارۋلى كۇشتەرىنە قاراتقان الاڭداۋشىلىعىنا تۇسىنىستىكپەن قارايتىنىن ايتقان.

«انادولى» اقپارات اگەنتتىگىنىڭ حابارىنا قاراعاندا، انكارا  بولشەكتەۋشى تەررورلىق ۇيىم دەپ ايىپتايتىن PKK-ءنىڭ سۇرياداعى ءبولىمى PYD-YPG كۇشتەرىنىڭ اقش-قا مالىمدەمە جولداپ، دايش-قا قارسى كۇرەستى توقتاتىپ، افرينعا كومەك كورسەتەتىنىن مالىمدەگەن. الايدا، اقش جاعى ولارعا بۇل قادامدارى قۇراما شتاتتىڭ قولداۋىنان ايىراتىنىن ەسكەرتكەن.

“The Qazaq Times”