كاتار پاتشا اۋلەتىنىڭ مۇشەسى ساۋد ارابياسى مەن ءباا قىسىمىنان ءوز ءومىرىن قيۋعا بەل بايلاعانىن حابارلادى

كاتار پاتشا اۋلەتىنىڭ مۇشەسى شەيح ابدۋللاح بين ءالي ءال-تاني ءوزىنىڭ بىرنەشە اي بويى ەركىنەن تىس ءباا-دا ۇستالىپ، قىسىمعا ۇشىراعانىن حابارلادى. ول سونداي-اق پارسى شىعاناعىنداعى ديپلوماتيالىق داعدارىس ساۋد ارابياسى مەن ءباا-نىڭ كاتاردىڭ بايلىعىن يەمدەنۋ ءۇشىن ۇيىمداستىرعان امال-ارەكەتى دەپ جاريالادى. كاتارلىقتارعا مەملەكەتتىلىگىن ساقتاپ قالۋعا مۇقيات بولۋ تۋرالى ەسكەرتۋ جاساعان ءال-تاني ءال-جازيراعا بەرگەن اۋديوحابارلاماسىندا ەشكىمگە زيان كەلتىرمەس ءۇشىن، ءوز ومىرىنە قول سالاتىنىن جەتكىزگەن. 

شەيح ابدۋللاح بين ءالي ءال-تاني ساۋد ارابياسى مەن ءباا تاراپىنان كاتاردىڭ قازىرگى بيلەۋشىسىنىڭ ورنىنا ۇسىنىلىپ كەلگەن كانديدات بولاتىن. بەس اراب مەملەكەتى كاتاردىڭ اۋە، قۇرلىق جانە تەڭىز جولدارىن جاۋىپ، "تەرروريزمدى قولدادى" دەگەن ايىپپەن ديپلوماتيالىق بلوكادا ورناتقان ماۋسىم ايىنان كەيىن، ول ساۋد ارابياسى مەن ءباا تەلەارنالارىندا دوحاعا قارسى ەنگىزىلگەن شارالاردى جاقتاپ، پىكىر ايتىپ ءجۇردى. بلوكادادان كەيىن وسى ەكى مەملەكەتتە تۇرعان كاتار پاتشا اۋلەتىنىڭ مۇشەسى 14 قاڭتار كۇنى ءوزىنىڭ كۇشپەن ۇستالىپ وتىرعانىن جانە ومىرىنە قانداي دا ءبىر قاۋىپ تونسە، ءباا ءامىرى كىنالى بولاتىنىن حابارلاپ، ارنايى بەينەجازبا جاريالادى.

15 قاڭتار كۇنى ءال-جازيرا العان اۋديوجازبادا شەيح ابدۋللاح بين ءالي ءال-تاني ءوزىنىڭ وتباسىنان قول ءۇزىپ، ەلىنە ورالا الماۋىنا ءباا ءامىرىن كىنالاپ، پارسى شىعاناعىنداعى داعدارىس كاتاردىڭ بايلىعىن قولعا ءتۇسىرۋ ءۇشىن ادەيى ۇيىمداستىرىلعانىن ايتقان. ساۋد ارابياسى مەن ءباا امىرلەرىنىڭ كاتارعا قاتىستى مۇددەسىن جاريا ەتكەن اۋديوجازبادا ول ءوز ەلىنىڭ ازاماتتارى مەن قازىرگى بيلەۋشىلەرىن جوعارىدا اتالعان مەملەكەتتەر ۇسىنعان قاراجات پەن التىنعا الدانىپ، ءوز وتانىن ءوز قولدارىمەن قۇردىمعا جىبەرىپ الماۋعا كەڭەس بەرەدى.

كاتار ۋنيۆەرسيتەتىنىڭ پروفەسسورى مادجەد ءال-انساري شەيح ءال-ءتانيدىڭ اتالعان مەملەكەتتەردىڭ باسشىلارىنا جاقىن جۇرگەندىكتەن، ولاردىڭ جوسپارىنا قانىق بولۋى ابدەن مۇمكىن دەپ ەسەپتەيدى. "كاتار داعدارىسى باستالعان ۋاقىتتا بەلسەندى بولعان ءال-ءتانيدىڭ كەيىننەن كوزدەن تاسا بولىپ كەتۋى، ونىڭ اتالعان مەملەكەتتەرمەن ارىپتەستىگى توقتاپ، قىسىمعا ۇشىراعانىن كورسەتەدى" ،- دەدى ول. وسى تۇستا اتالعان مەملەكەتتەر كاتار پاتشا اۋلەتىنىڭ مۇشەسىن ەركىنەن تىس ۇستاپ وتىرعانىن جوققا شىعارعانىن اتاپ ءوتۋ كەرەك.

سارسەنبى كۇنى شەيح ابدۋللاح بين ءالي ءال-تاني كۋۆەيتكە جەتكىزىلىپ، بىردەن اۋرۋحاناعا جاتقىزىلدى. ونىڭ اعاسى ءال-جازيراعا بەرگەن سۇحباتىندا باۋىرىنىڭ دەنساۋلىعى اراب مەملەكەتى باسشىلارىنىڭ قىسىمىنان كۇرت ناشارلاعانىن جەتكىزدى. سوڭعى دەرەكتەرگە سايكەس، ونىڭ جاعدايى بىرقالىپتى جانە جاقىن كۇندەرى اۋرۋحانادان شىعارىلۋى مۇمكىن.

“The Qazaq Times”