فوتو: Getty Images

فرانتسيانىڭ ءسۇت ونىمدەرىن شىعاراتىن Lactalis كومپانياسى بالالارى اۋرۋحاناعا جەتكىزىلگەن اتا-انالاردىڭ شاعىمىنان سوڭ، 83 مەملەكەتتەگى 12 ميلليونعا جۋىق بۇلدىرشىندەرگە ارنالعان ءسۇت ونىمدەرىن دۇكەن سورەلەرىنەن الىپ تاستادى. الدىن الا بولجامدار بويىنشا، ناۋقاس بالالار ءسۇت ونىمدەرىنىڭ قۇرامىنداعى اۋرۋ قوزدىرعىشتارىنان سالمونەللەز دەرتىنە شالدىققان بولۋى مۇمكىن. قازىر ءوندىرىس ورنىنداعى ونىمدەر زەرتحانادا تەكسەرىلىپ جاتىر. بۇل تۋرالى ۆۆس اقپاراتتىق اگەنتتىگى جازدى. 

قولدا بار اقپاراتتارعا قاراعاندا، "ساپاسىز" ءسۇت ونىمدەرىنەن فرانتسيادا 37 بالا زارداپ شەگىپ، ولاردىڭ 18-ىنە شۇعىل مەديتسينالىق كومەك كورسەتىلگەن. قازىر اۋرۋحاناداعى بۇلدىرشىندەردىڭ جاعدايى بىرقالىپتى. وسىعان ۇقساس ءبىر وقيعا يسپانيادا جانە گرەتسيادا (دالەلدەنگەن جوق) تىركەلگەن.

ماسەلەنىڭ اق-قاراسى انىقتالعانشا، فرانتسيانىڭ سولتۇستىك باتىسىنداعى، Lactalis كومپانياسىنا قاراستى كراون زاۋىتى جابىلدى. كومپانيانىڭ ءباسپاسوز حاتشىسى ميشەل نالەت ءوندىرىس ورنى قاجەتتى زەرتتەۋ جۇمىستارىن جۇرگىزۋگە ەشقانداي كەدەرگى كەلتىرمەيتىنىن حابارلادى.

Lactalis كومپانياسىنىڭ اتقارۋشى ديرەكتورى ەممانۋەل بەسنيە Journal du Dimanche باسىلىمىنا بەرگەن سۇحباتىندا كومپانيانىڭ اتالعان وندىرىستىك اقاۋلاردى جاسىرۋعا تىرىسقانى تۋرالى حاباردى جوققا شىعاردى. ول زارداپ شەككەن وتباسىلاردىڭ شىعىنىن وتەۋگە كەلىستى.

Lactalis كومپانياسى -  الەمدەگى ەڭ ءىرى ءسۇت ونىمدەرىن ءوندىرۋشى كومپانيالاردىڭ قاتارىندا. ونى جىلدىق تابىسى - 17 ملرد ەۋرو. ءبىر عانا فرانتسيانىڭ وزىندە 15 مىڭ ادامدى جۇمىسپەن قامتىپ وتىرعان كومپانيانىڭ الەمنىڭ 47 ەلىندە 246 ءوندىرىس ورنى بار.

“The Qazaq Times”