فوتو: Reuters

سولتۇستىك كورەيانىڭ اقپان ايىنىڭ 9-25 ارالىعىندا وڭتۇستىك كورەيانىڭ پحەنچحاندا وتەتىن قىسقى وليمپيادا ويىندارىنا سپورت قۇراماسىن جىبەرۋ تۋرالى ۇسىنىسى تالقىلانعان ەكىجاقتى كەزدەسۋ ناتيجەلى اياقتالدى. ەگەر بارلىق قابىلدانعان جوسپارلار جۇزەگە اساتىن بولسا، كورەي جارتى تۇبەگىندەگى قوس مەملەكەتتىڭ حوككەي سپورتشىلارى ءبىر توپتا، وداقتاس تۋدىڭ استىندا ونەر كورسەتەدى. بۇل تۋرالى ۆۆس اقپاراتتىق اگەنتتىگى جازدى. 

ەكى ەلدىڭ اراسىن ءبولىپ تۇرعان دەميليتاتسيالىق زونادا وتكەن كەزدەسۋدە سولتۇستىك كورەيا الداعى سپورت دوداسىنا 230 جانكۇيەر، 30 تاەكۆوندو شەبەرى، 140 وركەستر مۋزىكانتتان تۇراتىن دەلەگاتسيا قۇرامىن جىبەرۋگە كەلىستى. ودان بولەك، پيوڭياڭ كورشى مەملەكەتتە ناۋرىز ايىندا وتەدى دەپ جوسپارلانعان پاراليمپيادا ويىندارىنا 150 ادامنان تۇراتىن شاعىن قۇرامانى اتتاندىرۋعا نيەت ءبىلدىردى. سونداي-اق ، سپورت تاريحىندا العاش رەت وليمپيادا ويىندارىندا ەكى ەلدىڭ حوككەيدەن ايەلدەر قۇراماسى بىرلەسىپ، ءبىر كوماندادا باق سىناسادى.

سولتۇستىك كورەيانىڭ جارىسقا  قاتىساتىن سپورتشىلار مەن كوماندالاردى تىركەۋ مەرزىمىنەن كەش قالىپ قويعانىنا بايلانىستى، حالىقارالىق وليمپيادا كوميتەتى وسى سەنبىدە شۆەيتساريانىڭ لوزاننا قالاسىندا وتەتىن جيىندا قوس مەملەكەت اراسىندا جاسالعان كەلىسىمدى قاراستىرادى. وڭتۇستىك كورەيانىڭ الدىندا كورشى مەملەكەت دەلەگاتسياسىنىڭ كەلىپ-كەتۋىن  بۇۇ-نىڭ پحەنيانعا قارسى ەنگىزگەن سانكتسيالارىن بۇزباستان قامتاماسىز ەتۋ مىندەتى تۇر.

وڭتۇستىك كورەيانىڭ حوككەي قۇراماسىنىڭ جاتتىقتىرۋشىلارى مەن بىرقاتار كونسەرۆاتيۆتى كوزقاراستاعى باسىلىمدار ءوز سپورتشىلارىنىڭ "سولتۇستىك كورەيامەن ءبىر كوماندادا ونەر كورسەتۋى، ولاردىڭ جەڭىسكە جەتۋ ىقتيمالدىعىن ازايتادى" دەپ نارازىلىق ءبىلدىردى. ونداعان مىڭ ادام مەملەكەت باسشىسىنان كەلىسىمنىڭ كۇشىن جويۋدى تالاپ ەتىپ، ونلاين پەتيتسياعا قول قويعانى تۋرالى اقپارات بار. سارسەنبى كۇنى وڭتۇستىك كورەيانىڭ پرەزيدەنتى مۋن جاين بۇل قادامنىڭ قوس مەملەكەتتىڭ قارىم-قاتىناسىنا وڭ اسەر ەتەتىنىن ەرەكشە اتاپ ءوتتى. جاپونيا پرەمەر-ءمينيسترى تارو كونو "سولتۇستىك كورەيانىڭ كورشىسىنە جىلى قاباق تانىتا باستاۋى، وعان قارسى قولدانىلعان سانكتسيالاردىڭ وڭ ناتيجە بەرگەنىن كورسەتەدى" دەپ ەسەپتەيدى جانە ارىپتەستەرىن ەكونوميكالىق قىسىم شارالارىن وزگەرىسسىز قالدىرۋعا شاقىرادى.

“The Qazaq Times”