فوتو: Depo Photos via AP

سۇرياداعى كۇرد اسكەري توپتارى بۇدان بىلاي اقش باستاعان  "يسلام مەملەكەتى" لاڭكەستىك ۇيىمىنا قارسى كۇرەسۋشى كواليتسياعا كىرمەيدى. بۇل تۋرالى امەريكانىڭ اسكەري قيمىلدارىنا جاۋاپتى تۇلعالار مالىمدەدى. اتالعان شەشىم تۇركيا اقش-تىڭ  ءسۇريانىڭ شەكارالىق ايماقتارىنداعى اسكەرلەر سانىن 30 مىڭعا دەيىن جەتكىزۋ تۋرالى مالىمدەمەسى مەن كۇرد توپتارىمەن تىزە قوسىپ، تىعىز ارىپتەستىكتە بولۋىنا قارسىلىق بىلدىرگەننەن كەيىن قابىلدانىپ  وتىر. 

وسى حابارلاماسى ارقىلى اقش تۇركيا شەكارا اسىپ، كۇرد ادامدارىن قورعاۋ وداعى (YPG) دەپ اتالاتىن اسكەري توپتاردىڭ كوزىن جويۋعا بايلانىستى قيمىلدارعا بارسا، ولاردى قورعاۋعا كۇش سالىپ، انكارانىڭ جولىنا توسقاۋىل بولمايتىنىن ءبىلدىردى. وسىدان الدىن تۇركيا مەن ونىڭ باتىستىق سەرىكتەستەرى كۇردىستان جۇمىسشىلار پارتياسىمەن بايلانىسى بولعانى ءۇشىن "تەرروريستىك توپ" دەپ تانىعان YPG ۇيىمىنا اسكەري ينتەرۆەنتسيا باعىتتاۋى مۇمكىن ەكەنىن حابارلاعان بولاتىن.

وسىدان بۇرىن اقش كۇرد اسكەري توپتارىنىڭ سۇرياداعى تەرروريستىك توپتارعا قارسى كۇرەسكە قوسقان ۇلەسىن ەرەكشە باعالاپ، ولارعا اسكەري تەحنيكا، قارۋ-جاراق بەرۋ ارقىلى قولداۋ كورسەتىپ كەلگەن ەدى. ەندى پەنتاگوننىڭ ءباسپاسوز حاتشىسى ءال-جازيرا اقپاراتتىق اگەنتتىگىنە بەرگەن سۇحباتىندا YPG كۇشتەرى ورنالاسقان افرين ايماعىندا اقش باستاعان اسكەري كواليتسيانىڭ جوق ەكەندىگىن، امەريكانىڭ "يسلام مەملەكەتى" لاڭكەستىك ۇيىمىنا قارسى كۇرەسى ەفرات وزەنىنىڭ جاعالاۋىندا ءجۇرىپ جاتقانىن مالىمدەدى.

“The Qazaq Times”