وڭتۇستىك پەن سولتۇستىك كورەيا اراسىندا كەلىسسوز باستالدى

سولتۇستىك كورەيا مەن وڭتۇستىك كورەيا شەكارا ماڭىنداعى پحانمۋندجوم ەلدى مەكەنىندە ەكى ەل اراسىنداعى كەلىسسوز باستالدى، دەپ حابارلايدى ربك Yonhap اگەنتتىگىنە سىلتەمە جاساپ. پيوڭياڭ مەن سەۋل اراسىنداعى كەلىسسوز سوڭعى رەت 2015 جىلى بولعان.

وڭتۇستىك كورەيانىڭ بىرلەستىك مينيسترلىگى تاراتقان اقپاراتقا قاراعاندا، كەلىسسوز جەرگىلىكتى ۋاقىت بويىنشا 10:00-دە باستالعان. Reuters-ءتىڭ مالىمەتىنشە، سولتۇستىك كورەيا دەلەگاتسياسىن باسقارۋشى ءارى سول ەلدىڭ الەمدىك بىرلەستىك كوميتەتىنىڭ توراعاسى لي سوڭ گۋون كەلىسسوز باستالماس بۇرىن كەلىسسوزدىڭ جاقسى اياقتالاتىنىنا سەنىم بىلدىرگەن. "كەلىسسوز جاقسى وتەدى. بۇگىن سولتۇستىك كورەيا مەن وڭتۇستىك كورەيا ناقتى ءارى شىنايى كەلىسسوز وتكىزەدى", - دەپ مالىمدەگەن ول جۋرناليستەرگە.

ەكى ەل كەزدەسۋىندەگى باستى تاقىرىپ  سولتۇستىك كورەيانىڭ 2018 جىلدىڭ اقپانىندا پحيونچحاندا وتەتىن قىسقى وليمپيادا ويىندارىنا قاتىسۋى بولماق. بۇدان بولەك، ەكى ەل "قارىم-قاتىناستى رەتتەۋ" ماسەلەسىن قاراستىرادى.

پيوڭياڭنىڭ وڭتۇستىكتەگى سپورت جارىسىنا قاتىسۋى مۇمكىن ەكەنى تۋرالى ەل باسشىسى كيم جوڭ ۋن 31 جەلتوقسان كۇنى حالىققا ارناعان ۇندەۋىندە مالىمدەگەن. وسىدان كەيىن وڭتۇستىك كورەيا تەلەفون بايلانىسى ارقىلى بۇل ماسەلەنى جوعارى دەڭگەيدە تالقىلاۋ كەرەكتىگى تۋرالى ۇسىنىس تاستاعان. ارادا بەس كۇن وتكەن سوڭ، 5 قاڭتاردا سولتۇستىك كورەيانىڭ  وڭتۇستىك كورەيامەن تىكەلەي كەلىسسوز جۇرگىزۋگە كەلىسكەنى ءمالىم بولدى.

ەكى ەلدىڭ مۇنداي شەشىمىن اقش پرەزيدەنتى دونالد ترامپ تا قولداعان. 4 قاڭتار كۇنى پەنتاگون ۋاشينگتون مەن سەۋل اراسىندا وتەتىن اسكەري وقۋ-جاتتىعۋلارى كەيىنگە شەگەرىلىپ، وليمپيادا ويىندارى اياقتالعان سوڭ جالعاساتىنىن حابارلاعان ەدى.

“The Qazaq Times”