فوتو: EPA

فرانتسيانىڭ پرەزيدەنتى ەممانۋەل ماكرون تۇركيانىڭ ەۋرووداققا كىرۋ پروتسەسىنىڭ جاقسى جاققا وزگەرەتىنىنە ءۇمىت جوقتىعىن ايتتى. پاريجدە وتكەن بىرلەسكەن كونفەرەنتسيادا ماكرون ءوزىنىڭ بۇل پىكىرىن تۇركيانىڭ مەملەكەتتىك توڭكەرىس جاساۋعا تالپىنىس وقيعاسىنان كەيىن، ەل ىشىندە جۇرگىزگەن "جاپپاي تازالاۋ" (كۇدىكتىلەردى اباقتىعا جابۋ، قىزمەتىنەن بوساتۋ، قۋدالاۋ) شارالارىنا بايلانىستى ەۋروپامەن اراسىندا تۋىنداعان قايشىلىقتاردىڭ بولۋىمەن ءتۇسىندىردى. بۇل تۋرالى ۆۆس اقپاراتتىق اگەنتتىگى جازدى.

وسىدان بۇرىن تۇركيا پرەزيدەنتى رەجەپ تايىپ ەردوعان ەۋروپانىڭ وداققا قوسىلۋ پروتسەسى بويىنشا ناقتى شەشىمىن سوزباقتاپ جۇرگەنىنەن شارشاعانىن ايتىپ ەدى. ول ەۋرووداق باسشىلارىنان تۇركيانىڭ ۋاقىتىن الماۋىن وتىنگەن بولاتىن.

ەممانۋەل ماكرون ەۋروپا مەن تۇركيانىڭ قازىرگى قارىم-قاتىناسىنا قاراپ، بۇل پروتسەستىڭ ناتيجەلى اياقتالاتىنىنا ءۇمىت ارتۋدىڭ قاجەتى جوقتىعىن ايتتى. دەگەنمەن ول انكارانى ماڭىزدى ارىپتەس كورەدى جانە تۇركيا ەۋرووداققا قوسىلماعان كۇندە دە، قوس تاراپتىڭ اراسىنداعى ديپلوماتيالىق قارىم-قاتىناستاردىڭ جاقسى دەڭگەيدە ساقتالعانىن قالايدى.

“The Qazaq Times”