فوتو: Quora

اقش پاكىستانعا قاۋىپسىزدىك سالاسىندا قارجىلاي كومەك بەرۋدى توقتاتادى. مۇنداي شەشىم پاكىستاننىڭ ءوز اۋماعىنداعى حاككاني تەرروريستىك جەلىسى مەن اۋعانستان تاليباندارىنا قارسى كۇرەسىن جەتكىلىكتى جۇرگىزىپ وتىرماعانىمەن ءتۇسىندىرىلدى. وسىعان دەيىن دونالد ترامپ پاكىستان امەريكادان ميلليونداعان قارجى الىپ كەلگەنىنە قاراماستان، ەكسترەميستىك توپتاردىڭ قىزمەتىنە توسقاۋىل بولۋعا ءتيىستى شارالاردى قابىلداماي وتىرعانىن ايتقان بولاتىن. بۇل تۋرالى ۆۆس اقپاراتتىق اگەنتتىگى جازدى. 

پاكىستان ۇكىمەتى دونالد ترامپتىڭ مالىمدەمەسىن سالقىن قابىلداپ، امەريكا باسشىسىنىڭ تەرروريستىك اكتىلەردەن كوپ شىعىنعا ۇشىراعان ەلدىڭ ۇلەسىن جوققا شىعارعاندارىنا نارازى. اقش-تىڭ قاۋىپسىزدىك سالاسىنداعى قولداۋىن دوعارۋ تۋرالى شەشىمىن ءۇندىستان مەن اۋعانستان قۋانا قابىلداسا، يسلامابادقا ميلليونداعان ينۆەستيتسيا قۇيىپ وتىرعان قىتاي امەريكانىڭ ارەكەتىن ادىلەتسىز دەپ تاپتى.

پاكىستانعا وسىدان بۇرىن بىرنەشە رەت "اۋعانستان جەرىندە ءجيى جارىلىس جاسايتىن حاككاني جەلىسىنە استىرتىن قولداۋ كورسەتىپ، ءوز ەلىندە باسپانا ۇسىنىپ وتىر" دەگەن ايىپتار تاعىلعان. بىراق يسلاماباد ول پىكىرلەردىڭ ءبارىن جوققا شىعارىپ كەلگەن. مەملەكەت دەپارتامەنتىنىڭ حابارلاۋىنشا، پاكىستانعا باعىتتالعان 255 ملن فۋنت ستەرلينگ كولەمىندەگى قارجى اۋدارىلمايدى جانە اسكەري كومەكتى توقتاتۋ تۋرالى شەشىم يسلاماباد حاككاني جەلىسى مەن اۋعانستان تاليبتەرىنە قارسى كۇرەس قيمىلدارىن قاتاڭ قولعا العانعا دەيىن ءوز كۇشىندە قالا بەرەدى.

“The Qazaq Times”