فوتو: Getty Images

گەرمانيانىڭ دارىگەرلەرى بوسقىنداردىڭ جاسىن انىقتاۋ ءۇشىن، ولاردى  مەديتسينالىق تەكسەرىستەردەن وتكىزۋ تۋرالى ۇسىنىسقا قارسىلىق ءبىلدىردى. نەمىس مەديتسينالىق قاۋىمداستىعى مۇنداي شارالار ەتيكالىق تۇرعىدا دۇرىس ەمەستىگىن جەتكىزدى. ساياساتكەرلەر سوڭعى كەزدە دەپورتاتسيادان جالتارۋ ءۇشىن وزدەرىن 18 جاسقا تولماعان ازاماتتار دەپ كورسەتەتىن بوسقىنداردىڭ ناقتى جاسىن انىقتاۋ ءۇشىن ولاردى رەنتگەن ساۋلەسى ارقىلى تەكسەرىستەن وتكىزۋ سياقتى شارالاردى مىندەتتى تۇردە قولدانۋدى ۇسىنعان بولاتىن. 

بۇل شارالار گەرمانيانىڭ وڭتۇستىك-باتىسىندا "15 جاستاعى قىز اۋعانستاننان كەلگەن بوسقىننىڭ قولىنان ءولتىرىلدى" دەگەن ايىپتاردان كەيىن قولعا الىنباق. ءوزىن ءدال سول جاستاعى ءجاسوسپىرىم دەپ تانىستىرعان كۇدىكتىنىڭ سوزىنە سەنبەگەن قۇربان بولعان قىزدىڭ اكەسى: "ونىڭ 15 جاستا عانا بولۋى مۇمكىن ەمەس" دەگەن ەدى.

گەرمانيا كانتسلەرى انگەلا مەركەلدىڭ وداقتاستارى بوسقىنداردىڭ كوبى الەۋمەتتىك كومەك پەن ءارتۇرلى قولداۋ شارالارىنا قول جەتكىزۋ ءۇشىن وزدەرىن كامەلەتتىك جاسقا تولماعاندار ەسەبىندە كورسەتەتىنىن ايتادى. سوندىقتان بوسقىنداردىڭ شىنايى جاسىن  انىقتاۋ  ءۇشىن ولار رەنتگەن قۇرىلعىسى ارقىلى ولاردىڭ سۇيەكتەرىنىڭ دامۋىن باعالاۋ نە تىستەرىن ولشەۋ ۇسىنىلىپ وتىر.

نەمىس مەديتسينالىق قاۋىمداستىعىنىڭ باسشىسى فرانك ۋلريح مونتگومەري: "بۇل زەرتتەۋلەر كۇردەلى جانە قىمبات. بارلىق بوسقىنداردى مەديتسينالىق تەكسەرىستەن مىندەتتى تۇردە  وتكىزۋ ولاردىڭ قۇقىقتارىن بۇزادى", - دەپ مالىمدەدى.

“The Qazaq Times”