فوتو: ALAMY

وڭتۇستىك كورەيا پيوڭياڭعا  وسى جىلدىڭ اقپان ايىندا وتەتىن وليمپيادا ويىندارىنا سولتۇستىك كورەيا سپورتشىلارىنىڭ قاتىسۋ مۇمكىندىگىن تالقىلاۋ ءۇشىن كەزدەسۋدى ۇسىندى. وسىدان بۇرىن سولتۇستىك كورەيا پرەزيدەنتى كيم جوڭ ۋن پحەنچحاندا وتەتىن قىسقى وليمپيادا ويىندارىنا ءوز ەلىنىڭ اتىنان قۇراما جىبەرۋ تۋرالى ويلانۋ ۇستىندە ەكەنىن حابارلاعان ەدى. وڭتۇستىك كورەيا باسشىسى كەلەسى اپتانىڭ سەيسەنبىسىنە جوسپارلانعان كەزدەسۋ قوس تاراپتىڭ قارىم-قاتىناسىن جاقسارتۋعا جول اشاتىنىنا سەنىم ءبىلدىردى. بۇل تۋرالى ۆۆس اقپاراتتىق اگەنتتىگى جازدى. 

ەكى ەلدىڭ وكىلەتتى تۇلعالارىنىڭ باس قوسۋىنا قانشا دەلەگات قاتىساتىنى ءالى بەلگىسىز. ويتكەنى سولتۇستىك كورەيا ءالى جاۋاپ بەرگەن جوق. دەگەنمەن كەزدەسۋ پانمۋندجومداعى دەميليتاتسيالىق زونادا ورنالاسقان اۋىلدا وتەدى دەپ كۇتىلۋدە. بۇل - قوس كورەيا مەملەكەتىنىڭ كەزدەسۋلەرى باستالعان تاريحي جەر.

2015 جىلى جەلتوقسان ايىندا بولعان كەزدەسۋ ورتاق شەشىمگە كەلمەستەن اياقتالدى. 2017 جىلى وڭتۇستىك كورەيانىڭ اسكەري قيمىلدار مەن سوعىس كەزىندە ءبىر-بىرىنەن اجىراپ قالعان وتباسىلاردى جاقىندارىمەن قاۋىشتىرۋ ماسەلەسىن تالقىلاۋعا شاقىرعان ۇسىنىسى جاۋاپسىز قالدى.

بىراق جاڭا جىلدىڭ الدىنداعى سوزىندە سولتۇستىك كورەيا پرەزيدەنتى كيم جوڭ ۋن بارلىق كەلىسسوزدەرگە دايىن ەكەنىن ايتقان بولاتىن. بۇل كورشى مەملەكەت پەن الەم باسشىلارىنىڭ كەۋدەسىنە ءۇمىت سىيلاعانىمەن، ونىڭ اقش-قا قارسى يادرولىق قارۋ باتىرماسى ءاردايىم ۇستەل ۇستىندە ەكەنى جونىندەگى مالىمدەمەسى بارلىق سەنىمنىڭ كۇشىن جويدى.

وڭتۇستىك كورەياداعى قىسقى وليمپيادا ويىندارىنىڭ ۇيىمداستىرۋ كوميتەتىنىڭ پرەزيدەنتى لي حي بەم Yonhap اقپاراتتىق اگەنتتىگىنە بەرگەن سۇحباتىندا: "كورشى مەملەكەت سپورتشىلارىنىڭ جارىسقا قاتىسۋى جاڭا جىلدىق سىيلىق بولار ەدى", -  دەپ مالىمدەگەن.  سولتۇستىك كورەيا 1988 جىلى سەۋلدا  وتكەن وليمپيادا ويىندارىنا بويكوت جاريالاعان بولاتىن. پحەنيان وليمپيادا ويىندارىنا قاتىسۋ كۆاليفيكاتسياسىنا يە، مانەرلەپ سىرعاناۋ سپورتى بويىنشا  ريوم تايەك پەن كيم جۋ سيكتى رەسمي تىركەۋ پروتسەسىنە كەش قالعانىمەن، سپورتشىلار حالىقارالىق وليمپيادا كوميتەتىنىڭ شاقىرتۋىمەن دودادا باق سىناي الادى.

“The Qazaq Times”